سہیل آفریدی کے تین روزہ دورہ کراچی کا شیڈول جاری، سیاسی و قانونی حلقوں سے اہم ملاقاتیں متوقع

پشاور(جانو ڈاٹ پی کے)وزیراعلیٰ خیبر پختونخوا سہیل آفریدی کے تین روزہ دورۂ کراچی کا شیڈول سامنے آ گیا ہے۔ وزیراعلیٰ 9 سے 12 جنوری تک سندھ کے دورے پر رہیں گے، جس دوران وہ کراچی اور حیدرآباد میں سیاسی، قانونی اور سول سوسائٹی سے متعلق مختلف سرگرمیوں میں شرکت کریں گے۔

شیڈول کے مطابق وزیراعلیٰ سہیل آفریدی 9 جنوری کو دن 11 بجے کراچی ایئرپورٹ پہنچیں گے۔ دورے کے پہلے روز وہ انصاف ہاؤس میں اہم ملاقاتیں کریں گے، جس کے بعد کراچی پریس کلب کا دورہ بھی ان کے پروگرام میں شامل ہے۔

دورے کے دوسرے روز وزیراعلیٰ خیبر پختونخوا کراچی سے حیدرآباد روانہ ہوں گے، جہاں وہ حیدرآباد بار ایسوسی ایشن سے خطاب کریں گے اور اسٹریٹ موومنٹ میں حصہ لیں گے۔ دورے کے تیسرے روز وہ دوبارہ کراچی پہنچ کر کراچی بار ایسوسی ایشن سے خطاب کریں گے۔

وزیراعلیٰ کے ہمراہ وفد میں سلمان اکرم راجا، مینا خان آفریدی، شاہد خٹک اور شفیع جان شامل ہوں گے۔

دوسری جانب معاونِ خصوصی برائے اطلاعات خیبر پختونخوا شفیع جان نے اپنے بیان میں بتایا ہے کہ وزیراعلیٰ سہیل آفریدی اراکینِ اسمبلی کے ہمراہ سندھ کا دورہ کر رہے ہیں، جہاں وہ پارٹی اسیرانِ جیل، سول سوسائٹی کے نمائندوں اور پارٹی قیادت سے ملاقاتیں کریں گے۔

شفیع جان کے مطابق وزیراعلیٰ سندھ سے باضابطہ ملاقات اور مختلف بار ایسوسی ایشنز سے خطاب بھی دورے کا حصہ ہے۔ انہوں نے کہا کہ اسٹریٹ موومنٹ کی قیادت وزیراعلیٰ سہیل آفریدی خود کر رہے ہیں اور پارٹی کارکنان کو بھرپور سیاسی جدوجہد کے لیے متحرک کیا جا رہا ہے۔

انہوں نے مزید کہا کہ بانی چیئرمین عمران خان کی قید سیاسی انتقام اور جمہوری اقدار کی کھلی خلاف ورزی ہے، جبکہ عمران خان اور دیگر اسیر قیادت کی رہائی کے لیے ہر آئینی اور جمہوری فورم پر آواز بلند کی جائے گی۔