نیویارک کے نومنتخب میئر ظہران ممدانی کے اثاثے کتنے ہیں؟
نیویارک(جانوڈاٹ پی کے)امریکی صدر ڈونلڈ ٹرمپ اور ایلون مسک سمیت امریکا بھر سے 2 درجن سے زائد ارب پتیوں کی مخالفت کے باوجود 34 سالہ ڈیموکریٹک سوشلسٹ امیدوار ظہران ممدانی نیویارک کے نئے میئر منتخب ہوگئے ہیں۔
ظہران ممدانی1991 میں یوگنڈا کے دارالحکومت کمپالا میں پیدا ہوئے، ان کے والد بھارتی نژاد اسکالر محمود ممدانی جب کہ والدہ فلمساز میرا نائر ہیں۔
والد کی کولمبیا یونیورسٹی میں ملازمت ہوتے ہی ظہران ممدانی کا خاندان نیو یارک منتقل ہوگیا تھا، اس وقت ظہران ممدانی کی عمر 7 سال تھی۔
ظہران ممدانی کے اثاثوں کی مالیت کتنی ہے؟
حال ہی میں فوربز افریقا کی جانب سے جاری ایک رپورٹ میں ظہران ممدانی کے معمولی اثاثوں کے مالک ہونے کا انکشاف ہوا ہے۔
فوربز کے مطابق ظہران ممدانی یکم جنوری 2026 کو عہدہ سنبھالیں گے، اس وقت بطور نیویارک میئر ظہران ممدانی کی تنخواہ 2 لاکھ 60 ہزار ڈالر سالانہ ہوجائے گی، نیویارک کی ریاستی اسمبلی کے طور پر ممدانی کی تنخواہ ایک لاکھ 42 ہزار ڈالر ہے۔
دوسری جانب ظہران ممدانی ’مسٹر کارڈیمم ‘ کے نام سے اپنے ہپ ہاپ کیرئیر سے تقریباََ ایک ہزار ڈالرز بطور میوزک رائلٹیز وصول کرتے ہیں۔
ظہران ممدانی اس وقت نیویارک سٹی میں کوئنز کاؤنٹی کے علاقے اسٹوریا میں ایک کرائے کے اپارٹمنٹ میں رہائش پذیر ہیں، ممدانی اس اپارٹمنٹ کا کرایہ 2 ہزار 250 ڈالرز ماہانہ ادا کرتے ہیں۔
اگر ممدانی اب میئر کی سرکاری رہائش گاہ گریسی مینشن کا انتخاب کرتے ہیں تو اس طرح وہ ہر ماہ اپنا کرایہ بچا سکیں گے۔
رپورٹ میں بتایا گیا ہے کہ ظہران ممدانی کی اپنی کوئی ذاتی گاڑی بھی نہیں ہے، وہ سفر کرنے کے لیے پبلک ٹرانسپورٹ کا استعمال کرتے ہیں۔
ظہران ممدانی کے اثاثوں میں 2016 میں یوگنڈا کے شہر جنجا میں خریدی گئی 4 ایکڑ اراضی شامل ہے، اس اراضی کی مالیت اس وقت ڈیڑھ لاکھ ڈالر سے ڈھائی لاکھ ڈالر کے درمیان بنتی ہے تاہم اس جائیداد کے حوالے سے یہ واضح نہیں کہ یہ جائیداد خریدی گئی یا انہیں بطور تحفہ ملی۔
فوربز کے مطابق اگر ظہران ممدانی کے اثاثوں کا موازنہ ان کے حریف اور سابق گورنر اینڈریو کومو سے لگایا جائے تو اینڈریو کومو ممدانی سے 50 گنا زیادہ اثاثوں کے مالک ہیں۔
ظہران ممدانی کے اثاثوں کی مالیت اس وقت 2 لاکھ ڈالر بنتی ہے اور اینڈریو کومو کے اثاثوں کی مالیت 10 ملین ڈالر ہے۔
ظہران ممدانی کے والدین کے اثاثے
ظہران ممدانی کے والد اور والدہ ہارورڈ کے تعلیم یافتہ ہیں، ان کے والد اسکالر محمود ممدانی 7 کتابیں تحریر کرچکے ہیں اور کولمبیا میں پروفیسر ہیں۔
امریکن ایسوسی ایشن آف یونیورسٹی پروفیسرز کے کولمبیا کے ڈیٹا کی بنیاد پر وہ ممکنہ طور پر سالانہ 2 لاکھ سے 3 لاکھ ڈالر کماتے ہیں۔
