پشاور: زمونگ کور میں بچوں کے ساتھ نامناسب رویہ، وزیر اعلیٰ نے ایکشن لے لیا
پشاور (جانوڈاٹ پی کے)وزیر اعلیٰ خیبرپختونخوا سہیل آفریدی نے یتیم اور بے سہارا بچوں کے لیے قائم زمونگ کور ماڈل انسٹیٹیوٹ میں بچوں کے نکالے جانے کے معاملے پر فوری انکوائری کا حکم دے دیا ہے۔
وزیر اعلیٰ کے پی نے گزشتہ رات انسٹیٹیوٹ کا اچانک دورہ کیا، جہاں انہوں نے مقیم بچوں اور انتظامیہ سے ملاقات کی، مسائل سنے اور فوری احکامات جاری کیے۔ سہیل آفریدی نے 11 بچوں کے انسٹیٹیوٹ سے نکالے جانے کے واقعے کی تحقیقات کے لیے فوری انکوائری کا حکم دیا۔
انہوں نے بچوں کو فراہم کی جانے والی ہائیجین کٹس کی تقسیم، کلاس رومز میں کیمروں کی تنصیب، اور درکار اساتذہ کی فوری فراہمی پر بھی انکوائری اور احکامات جاری کیے۔ وزیر اعلیٰ نے بچوں کے لیے کمپلینٹ سیل کے قیام، نجی کالجز میں زیر تعلیم بچوں کی فیس کی حکومت کی جانب سے ادائیگی، ای ٹی اے میرٹ اسکالرشپس میں خصوصی کوٹہ، اور انسٹیٹیوٹ کے اکاؤنٹس و وظیفے کی ادائیگی کے نظام کو ڈیجیٹل کرنے کا بھی حکم دیا۔
مزید برآں وزیر اعلیٰ نے کالجز اور سپورٹس اکیڈمیز جانے والے بچوں کے لیے ٹرانسپورٹ سروس کی فراہمی کی ہدایت بھی کی۔ سہیل آفریدی نے انسٹیٹیوٹ کے مختلف سیکشنز کا معائنہ کیا، کھانے کے معیار کا جائزہ لیا، اور گرلز کیمپس کا دورہ کیا، جہاں پچھلے دورے کے موقع پر جاری احکامات پر عملدرآمد کا جائزہ لیا گیا۔
وزیر اعلیٰ نے کہا کہ یتیم اور بے سہارا بچوں کی دیکھ بھال حکومت کی آئینی، اخلاقی اور انسانی ذمہ داری ہے۔ زمونگ کور انسٹیٹیوٹ عمران خان کے احساس وژن کے تحت قائم ہیں اور انہیں اصل روح کے مطابق چلایا جائے گا۔ انہوں نے واضح کیا کہ انسٹیٹیوٹ کے تمام معاملات کی وہ بذات خود نگرانی کریں گے۔
