چینی کمیونسٹ پارٹی کو نئے چیلنجز سے ہم آہنگ ہونا ہوگا، شی جن پنگ

بیجنگ(ویب ڈیسک) چینی صدر شی جن پنگ نے کہا ہے کہ چینی کمیونسٹ پارٹی کو بدلتے ہوئے قومی اور عالمی حالات کے مطابق خود کو مزید مؤثر انداز میں ہم آہنگ کرنا ہوگا تاکہ مستقبل کے چیلنجز کا کامیابی سے مقابلہ کیا جا سکے۔

چینی کمیونسٹ پارٹی کے قیام کی 105ویں سالگرہ کی تقریب سے خطاب کرتے ہوئے شی جن پنگ نے کہا کہ چین اس وقت ایسے مرحلے سے گزر رہا ہے جہاں ترقی کے نئے مواقع اور مختلف نوعیت کے خطرات بیک وقت موجود ہیں، اس لیے قومی یکجہتی، اتحاد اور ہم آہنگی پہلے سے کہیں زیادہ اہم ہو چکی ہے۔

انہوں نے پارٹی ارکان پر زور دیا کہ وہ نظم و ضبط کو مزید مضبوط بنائیں، داخلی احتساب کو فروغ دیں اور پارٹی کی ساکھ، ترقی اور پاکیزگی کو نقصان پہنچانے والے عناصر کے خلاف مؤثر اقدامات کریں۔

چینی صدر نے اس عزم کا اظہار کیا کہ کمیونسٹ پارٹی ملک میں استحکام، معاشی و سماجی ترقی اور عالمی سطح پر چین کے کردار کو مزید مستحکم بنانے کے لیے اپنی کوششیں جاری رکھے گی۔