وزیر اعظم شہباز شریف ورلڈ اکنامک فورم 2026 میں شرکت کیلئے ڈیووس روانہ

اسلام آباد(جانوڈاٹ پی کے)وزیر اعظم محمد شہباز شریف ورلڈ اکنامک فورم (WEF) کی سالانہ کانفرنس 2026 میں شرکت کے لیے سوئٹزرلینڈ کے شہر ڈیووس روانہ ہو گئے ہیں۔

ترجمان دفتر خارجہ کے مطابق وزیرِ اعظم 19 سے 23 جنوری 2026 تک ورلڈ اکنامک فورم کی سالانہ کانفرنس میں شرکت کے لیے ڈیووس کا سرکاری دورہ کر رہے ہیں۔

وزیر اعظم کے ہمراہ ایک اعلیٰ سطحی وفد بھی ہے، جس میں نائب وزیر اعظم و وزیر خارجہ محمد اسحاق ڈار، وزیر اقتصادی امور احد چیمہ، وزیر اطلاعات عطا اللہ تارڑ، معاون خصوصی طارق فاطمی اور دیگر سینئر حکام شامل ہیں۔

دورے کے دوران وزیر اعظم کی اہم سفارتی اور اقتصادی مصروفیات شیڈول ہیں، جن کے تحت وہ مختلف سربراہانِ مملکت و حکومت اور بین الاقوامی تنظیموں کے قائدین سے دو طرفہ ملاقاتیں کریں گے۔

دورے کا ایک اہم حصہ بزنس راؤنڈ ٹیبل کانفرنس ہے، جس کا مشترکہ اہتمام پاکستان اور ورلڈ اکنامک فورم کی جانب سے کیا جا رہا ہے۔ اس فورم میں عالمی سطح کی نمایاں کمپنیوں کے سربراہان شرکت کریں گے، جو پاکستان میں سرمایہ کاری کے مواقع تلاش کرنے اور اپنی موجودہ سرمایہ کاری کو وسعت دینے میں دلچسپی رکھتے ہیں۔