ملک کے بیشتر علاقوں میں سرد اور خشک موسم، میدانی علاقوں میں شدید دھند

لاہور، اسلام آباد(جانو ڈاٹ پی کے)محکمہ موسمیات کے مطابق ملک کے بیشتر علاقوں میں موسم سرد اور خشک رہنے کا امکان ہے، جبکہ پہاڑی علاقوں میں شدید سردی کی لہر برقرار رہنے کی توقع ہے۔

محکمہ موسمیات کا کہنا ہے کہ پنجاب، بالائی سندھ اور خیبرپختونخوا کے میدانی علاقوں میں صبح اور رات کے اوقات کے دوران درمیانی سے شدید دھند چھائے رہنے کا امکان ہے، جس کے باعث حدِ نگاہ متاثر ہو سکتی ہے۔

اسلام آباد اور گردونواح میں موسم سرد اور خشک رہے گا، تاہم صبح کے وقت چند مقامات پر کہرا پڑنے کی پیش گوئی کی گئی ہے۔

پنجاب کے بیشتر اضلاع میں سرد اور خشک موسم متوقع ہے، جبکہ مری، گلیات اور ملحقہ علاقوں میں شدید سردی کا امکان ہے۔ صوبے کے مختلف میدانی اضلاع میں دھند کی شدت برقرار رہنے کی پیش گوئی کی گئی ہے۔

سندھ کے بالائی اضلاع بشمول سکھر، لاڑکانہ، دادو اور گردونواح میں بھی درمیانی سے شدید دھند چھائے رہنے کا امکان ہے۔ خیبرپختونخوا کے میدانی علاقوں میں سرد اور خشک موسم رہے گا، جبکہ پشاور، مردان، بنوں اور ڈی آئی خان سمیت مختلف علاقوں میں دھند متوقع ہے۔

گلگت بلتستان اور کشمیر میں موسم شدید سرد اور خشک رہنے کی توقع ہے، تاہم کشمیر میں صبح کے اوقات میں چند مقامات پر کہرا پڑ سکتا ہے۔

محکمہ موسمیات کے مطابق بلوچستان کے بیشتر اضلاع میں موسم سرد اور خشک رہے گا، جبکہ شمالی اضلاع میں موسم انتہائی سرد رہنے کا امکان ہے اور کم سے کم درجہ حرارت کئی علاقوں میں نقطہ انجماد سے نیچے ریکارڈ کیا گیا ہے۔

محکمہ موسمیات کے مطابق کوئٹہ میں کم سے کم درجہ حرارت منفی 4، قلات میں منفی 7، زیارت میں منفی 9 اور ژوب میں منفی 2 ڈگری سینٹی گریڈ ریکارڈ کیا گیا۔ سبی میں درجہ حرارت 6، تربت میں 12، نوکنڈی میں 1 اور چمن میں منفی 1 ڈگری سینٹی گریڈ ریکارڈ ہوا، جبکہ گوادر میں 12 اور جیوانی میں 11 ڈگری سینٹی گریڈ کم سے کم درجہ حرارت رہا۔

محکمہ موسمیات نے شہریوں کو سرد موسم کے دوران احتیاطی تدابیر اختیار کرنے، دھند کے باعث محتاط ڈرائیونگ کرنے اور بزرگوں، بچوں و کمزور افراد کی خصوصی دیکھ بھال کی ہدایت کی ہے۔