حکومت نے آئی ایم ایف کی ایک اور شرط مان لی!گندم کی خریداری کے عمل سے باہر نکلنے کا فیصلہ

لاہور(جانو ڈاٹ پی کے)حکومت نے گندم کی خریداری کے عمل سے باہر نکلنے کا فیصلہ کرلیا۔وفاق اور صوبے صرف گندم کا ایمرجنسی اسٹاک ہی اپنے پاس رکھیں گے،وفاق اور صوبے سال بھرکیلئے62لاکھ میٹرک ٹن گندم ہی ذخیرہ کریں گے،اسٹریٹجک ذخائر کی خریداری بھی وفاق کے بجائے نجی کمپنی کرے گی۔وفاق15لاکھ، پنجاب25اور سندھ10 لاکھ میٹرک ٹن گندم کا ذخیرہ رکھے گا،خیبرپختونخوا ساڑھے7لاکھ اور بلوچستان5لاکھ ٹن گندم ذخیرہ کرسکے گا، وفاق اور صوبوں کے لیے گندم نجی کمپنی خریدے گی۔وزارت صنعت و پیداوار کے مطابق فنانسنگ اور گندم رکھنے کی ذمہ دار بھی کمپنی ہوگی، وفاق صرف سروسز چارج دے گا، حکومت کو 570ارب روپے کی سالانہ بچت کا تخمینہ ہے۔ذرائع کا کہنا ہے کہ وزارت غذائی تحفظ نے سروسز چارجز کیلئے30ارب روپے مختص کردیے ہیں،گندم کی سپورٹ پرائس سسبڈی بھی نہیں ہوگی، قیمتوں کا تعین عالمی مارکیٹ کے مطابق ہوگا۔ وزارت غذائی تحفظ عالمی بینچ مارک کو مدنظر رکھتے ہوئے قیمت طے کرے گی۔