معروف ویڈیو گیم ڈویلپر ونس زیمپیلا کار حادثے میں جان بحق، گیمنگ کمیونٹی میں صدمہ کی لہر

لاس اینجلس(جانوڈاٹ پی کے)عالمی شہرت یافتہ ویڈیو گیم کے شریک خالق اور معروف ویڈیو گیم ڈویلپر ونس زیمپیلا ایک افسوسناک ٹریفک حادثے میں ہلاک ہوگئے۔

غیر ملکی میڈیا رپورٹس کے مطابق ونس زیمپیلا شمالی لاس اینجلس کے ایک خوبصورت اور قدرتی مناظر سے بھرپور علاقے میں اپنی فیراری کار چلانے میں مصروف تھے کہ المناک حادثے کی زد میں آگئے، جو جان لیوا ثابت ہوا۔

رپورٹس کے مطابق ونس زیمپیلا نہ صرف ایک کامیاب گیم ڈویلپر تھے بلکہ وہ ایک اعلیٰ سطح کے ایگزیکٹو بھی تھے۔

ان کے زیرِ قیادت قائم اسٹوڈیوز نے دنیا کی سب سے زیادہ فروخت ہونے والی ویڈیو گیمز تخلیق کیں، جن میں کال آف ڈیوٹی کو نمایاں مقام حاصل ہے۔

رپورٹس کے مطابق معروف ویڈیو گیم ڈویلپر کی اچانک موت نے عالمی گیمنگ انڈسٹری میں سوگ کی فضا پیدا کردی ہے، شائقین اور ماہرین کی جانب سے ان کی خدمات کو خراجِ تحسین پیش کیا جارہا ہے۔