فلمی ڈائیلاگ اور ہوا میں تیر چلانے سے تحریکیں نہیں چلتی، عظمیٰ بخاری
لاہور(جانوڈاٹ پی کے) وزیرِ اطلاعات پنجاب عظمیٰ بخاری نے کہا ہے کہ فلمی ڈائیلاگ مارنے اور ہوا میں تیر چلانے سے کوئی تحریک نہیں چلتی۔
اپنے بیان میں صوبائی وزیر کا کہنا تھا کہ الیکٹرک بسیں سردی کے موسم میں عوام کے لیے ایک نعمت ثابت ہو رہی ہیں اور پنجاب کے شہری سستی، آرام دہ اور جدید سفری سہولت سے بھرپور فائدہ اٹھا رہے ہیں۔
عظمیٰ بخاری نے کہا کہ پنجاب کا عام آدمی وزیراعلیٰ مریم نواز کو جدید سفری سہولیات فراہم کرنے پر دعائیں دے رہا ہے، وزیراعلیٰ پنجاب کا ہر منصوبہ عوام کو ریلیف دینے کے لیے ہے۔
انہوں نے کہا کہ ماضی قریب میں پنجاب کے عوام کو بزدار اور گوگی جیسے کرداروں نے جھانسہ دیا، تاہم پنجاب میں عوام کی نمائندہ حکومت آنے سے ترقی اور خوشحالی واپس آ چکی ہے۔
صوبائی وزیر نے کہا کہ اب پنجاب کے ہر ضلع میں یکساں ترقیاتی کام ہو رہے ہیں اور مسلم لیگ (ن) کا منشور ملک کی ترقی اور عوام کی خوشحالی ہے۔
عظمیٰ بخاری کا کہنا تھا کہ جو لوگ سٹریٹ موومنٹ چلانے آئے تھے، آج وہ تحفظِ کرسی موومنٹ میں مصروف ہیں، اڈیالہ کا مستقل رہائشی جیل میں فرسٹریشن کا شکار ہو چکا ہے اور اس کی انتشاری سیاست کے باعث اس کے اپنے لوگ بھی اس کا ساتھ چھوڑ رہے ہیں۔
