پاکستان کا وینزویلا کی صورتحال پر اظہارِ تشویش، یکطرفہ فوجی کارروائیوں کو عالمی امن کیلئے خطرہ قرار دے دیا

نیویارک (جانوڈاٹ پی کے)پاکستان نے وینزویلا میں حالیہ پیش رفت پر گہری تشویش کا اظہار کرتے ہوئے یکطرفہ فوجی کارروائیوں کو علاقائی اور عالمی امن و سلامتی کیلئے خطرناک قرار دے دیا ہے۔

اقوامِ متحدہ کی سلامتی کونسل کے اجلاس سے خطاب کرتے ہوئے پاکستان کے قائم مقام مستقل مندوب عثمان جدون نے کہا کہ دنیا پہلے ہی متعدد بحرانوں کا سامنا کر رہی ہے، ایسے میں کیریبین خطے میں بڑھتی ہوئی کشیدگی عالمی امن کیلئے نئے خطرات کو جنم دے سکتی ہے۔

عثمان جدون کا کہنا تھا کہ پاکستان وینزویلا کی صورتحال کو نہایت سنجیدگی سے دیکھ رہا ہے اور سیاسی اختلافات کا واحد پائیدار حل مکالمہ اور سفارتکاری ہے۔ انہوں نے واضح کیا کہ اقوامِ متحدہ کا منشور رکن ممالک کو کسی بھی ریاست کی علاقائی سالمیت یا سیاسی خودمختاری کے خلاف طاقت کے استعمال یا اس کی دھمکی سے باز رہنے کا پابند بناتا ہے۔

انہوں نے کہا کہ منشورِ اقوامِ متحدہ خودمختار مساوات، ریاستی خودمختاری کے احترام، اندرونی معاملات میں عدم مداخلت اور بین الاقوامی تنازعات کے پُرامن حل جیسے بنیادی اصولوں کی ضمانت دیتا ہے، جبکہ یکطرفہ فوجی کارروائیاں ان اصولوں کی صریح خلاف ورزی ہیں۔

پاکستانی مندوب نے خبردار کیا کہ ایسے اقدامات خطرناک نظائر قائم کرتے ہیں جو عالمی قانونی ڈھانچے کو کمزور کرنے کے ساتھ ساتھ عدم استحکام کو بھی ہوا دیتے ہیں، جس کے اثرات برسوں تک غیر متوقع اور بے قابو رہ سکتے ہیں۔

عثمان جدون نے زور دیا کہ موجودہ نازک مرحلے پر آگے بڑھنے کا واحد راستہ مکالمہ، سفارتکاری اور پُرامن ذرائع کا اختیار کرنا ہے۔ ان کا کہنا تھا کہ وینزویلا کے عوام کی آزادانہ مرضی کا مکمل احترام اور کسی بھی بیرونی مداخلت سے اجتناب ناگزیر ہے۔

انہوں نے امید ظاہر کی کہ لاطینی امریکہ اور کیریبین کا خطہ بطور زونِ امن، تصادم اور محاذ آرائی سے محفوظ رہے گا اور خطے کے عوام کے لئے خوشحالی اور مضبوط علاقائی تعاون کی راہ پر گامزن رہے گا۔

پاکستان نے تمام فریقین پر زور دیا کہ وہ تحمل کا مظاہرہ کریں، کشیدگی میں کمی لائیں، پُرامن بقائے باہمی کو فروغ دیں اور صورتحال کو مزید بگاڑنے والے کسی بھی اقدام سے گریز کرتے ہوئے خلوصِ نیت کے ساتھ مکالمے اور ثالثی کی کوششوں کو موقع دیں۔