انڈر 19 ایشیا کپ فائنل: بھارت کا پاکستان کیخلاف ٹاس جیت کر فیلڈنگ کا فیصلہ

دبئی (جانوڈاٹ پی کے) انڈر 19 ایشیا کپ کے فائنل میں بھارت نے ٹاس جیت کر پاکستان کیخلاف فلڈنگ کا فیصلہ کر لیا، روایتی حریف ممالک کے لٹل سٹارز فیصلہ کن مقابلے کے لیے تیار ہیں اور شائقین کرکٹ ایک دلچسپ مقابلے کی اُمید کر رہے ہیں۔

پاکستان کے کپتان فرحان یوسف کا کہنا ہے کہ گرین شرٹس پوری تیاری کے ساتھ میدان میں اتریں گے اور ٹائٹل جیتنے کی کوشش کریں گے، ٹیم کا مورال بلند ہے اور کھلاڑی پُرعزم ہیں کہ فائنل میں بہترین کارکردگی دکھائیں۔

پاکستان کی انڈر19 ٹیم اس ٹورنامنٹ میں شاندار کھیل کا مظاہرہ کرتی آئی ہے، سیمی فائنل میں گرین شرٹس نے بنگلہ دیش کو 8 وکٹوں سے شکست دی، جبکہ بھارت نے دوسرے سیمی فائنل میں سری لنکا کو ہرایا تھا۔

پاکستان کی بیٹنگ لائن میں نوجوان بلے باز سمیر منہاس خصوصی توجہ کا مرکز ہیں، وہ 4 میچوں میں 299 رنز سکور کر چکے ہیں جن میں ایک سنچری اور ایک نصف سنچری بھی شامل ہے۔

بولنگ میں بھی پاکستان کی ٹیم مضبوط ہے، رائٹ آرم فاسٹ بولر عبد السبحان 11 جبکہ لیفٹ آرم بولر محمد صیام اب تک 8 وکٹیں لے چکے ہیں۔

دلچسپ بات یہ ہے کہ پاکستان دو بار آئی سی سی انڈر19 ورلڈ کپ جیت چکا ہے، مگر اب تک ایشیا کپ کی ٹرافی اس کے حصے میں نہیں آئی البتہ 2012 کے انڈر19 ایشیا کپ میں پاکستان بھارت کے ساتھ مشترکہ چیمپئن ضرور رہا تھا۔