انڈر 19 ایشیا کپ فائنل:سمیر منہاس کے 172 رنز، بھارت کو جیت کیلئے 348 کا ہدف
دبئی (مانیٹرنگ ڈیسک) انڈر 19 ایشیا کپ کے فائنل میں پاکستان نے بھارت کی دعوت پر پہلے کھیلتے ہوئے 348 رنز کا ہدف دے دیا، سمیر منہاس نے شاندار کھیل پیش کرتے ہوئے 172 رنز بنائے۔
دبئی میں کھیلے جارہے انڈر 19 ایشیا کپ کے فائنل میں بھارت نے پاکستان کے خلاف ٹاس جیت کر پہلے فیلڈنگ کا فیصلہ کیا ہے۔
پاکستان نے مقررہ 50 اوورز میں 8 وکٹوں کے نقصان پر 347 رنز سکور کیے اور بھارت کو جیت کے لیے 348 رنز کا ہدف دیا۔
بھارت کے خلاف سمیر منہاس نے 17 چوکے اور 9 چھکوں کی مدد سے دھواں دھار 172 رنز کی اننگز کھیلی، انہوں نے 103 رنز محض 71 گیندوں پر بنائے، سمیر اس ٹورنامنٹ کے ٹاپ سکورر ہیں۔
اس کے علاوہ احمد حسین نے 56، عثمان خان نے 35، کپتان فرحان یوسف نے 19 اور حمزہ ظہور نے 18رنز بنائے۔ محمد صیام 13 اور نقاب شفیق 12رنز کے ساتھ ناٹ آؤٹ رہے۔
بھارت کی جانب سے دپیش دیوندرن نے 3، کھیلان پٹیل اور ہینل پٹیل نے 2-2 کھلاڑیوں کو آؤٹ کیا۔
ٹاس کے بعد گفتگو کرتے ہوئے پاکستان کے کپتان فرحان یوسف کا کہنا تھا کہ گرین شرٹس پوری تیاری کے ساتھ میدان میں اترے گی اور ٹائٹل جیتنے کی کوشش کریں گے، ٹیم کا مورال بلند ہے اور کھلاڑی فائنل میں بہترین کارکردگی دکھانے کے لئے پُرعزم ہیں۔
یاد رہے کہ پاکستان کی انڈر19 ٹیم اس ٹورنامنٹ میں شاندار کھیل کا مظاہرہ کرتی آئی ہے، سیمی فائنل میں گرین شرٹس نے بنگلہ دیش کو 8 وکٹوں سے شکست دی، جبکہ بھارت نے دوسرے سیمی فائنل میں سری لنکا کو ہرایا تھا۔
پاکستان کی بیٹنگ لائن میں نوجوان بلے باز سمیر منہاس خصوصی توجہ کا مرکز ہیں، وہ 4 میچوں میں 299 رنز سکور کر چکے ہیں جن میں ایک سنچری اور ایک نصف سنچری بھی شامل ہے۔
بولنگ میں بھی پاکستان کی ٹیم مضبوط ہے، رائٹ آرم فاسٹ بولر عبد السبحان 11 جبکہ لیفٹ آرم بولر محمد صیام اب تک 8 وکٹیں لے چکے ہیں۔
دلچسپ بات یہ ہے کہ پاکستان دو بار آئی سی سی انڈر19 ورلڈ کپ جیت چکا ہے، مگر اب تک ایشیا کپ کی ٹرافی اس کے حصے میں نہیں آئی البتہ 2012 کے انڈر19 ایشیا کپ میں پاکستان بھارت کے ساتھ مشترکہ چیمپئن ضرور رہا تھا۔
