امریکا کا ایران پر معاشی حملہ: تجارت کرنے والے ممالک پر 25 فیصد اضافی ٹیرف عائد

واشنگٹن (مانیٹرنگ ڈیسک)امریکی صدر ڈونلڈ ٹرمپ نے ایران کے خلاف سخت معاشی اقدامات کرتے ہوئے نئی پابندیوں کا اعلان کر دیا ہے، جس کے تحت ایران کے ساتھ تجارت کرنے والے ممالک پر 25 فیصد اضافی ٹیرف عائد کر دیا گیا ہے۔

صدر ٹرمپ نے سوشل میڈیا پلیٹ فارم ٹروتھ سوشل پر اپنے بیان میں کہا کہ اضافی ٹیرف کا اطلاق فوری طور پر نافذ العمل ہوگا اور یہ فیصلہ حتمی ہے، جس میں کسی قسم کی تبدیلی نہیں کی جائے گی۔

غیر ملکی خبر رساں ادارے کے مطابق یہ اقدام ایسے وقت سامنے آیا ہے جب امریکی صدر ایران کے خلاف بارہا سخت مؤقف اختیار کرتے ہوئے مداخلت کی دھمکیاں دے چکے ہیں۔ صدر ٹرمپ اس سے قبل خبردار کر چکے ہیں کہ امریکا کے پاس ایران کے خلاف انتہائی سخت آپشنز موجود ہیں، جن میں فوجی کارروائی بھی شامل ہے۔

امریکی انتظامیہ کا کہنا ہے کہ وہ ایرانی اپوزیشن رہنماؤں سے بھی رابطے میں ہے، جبکہ خطے کی صورتحال پر گہری نظر رکھی جا رہی ہے۔

دوسری جانب ایران کے وزیر خارجہ عباس عراقچی نے کہا ہے کہ ان کی حکومت امریکا کی جانب سے بھیجی گئی تجاویز کا باریک بینی سے جائزہ لے رہی ہے اور امریکی خصوصی نمائندے اسٹیو وٹکوف کے ساتھ رابطے بدستور قائم ہیں۔

عباس عراقچی کا مزید کہنا تھا کہ امریکی صدر کی جانب سے یہ انتباہ کہ اگر ایران میں احتجاج خونریز ہوا تو فوجی کارروائی کی جا سکتی ہے، دراصل ’’دہشت گرد عناصر‘‘ کو اکسانے کے مترادف ہے۔

واضح رہے کہ ایران میں حکومت مخالف مظاہرے جاری ہیں، جبکہ ایک امریکی انسانی حقوق تنظیم کے دعوے کے مطابق گزشتہ دو ہفتوں کے دوران ان مظاہروں میں اب تک 490 افراد ہلاک ہو چکے ہیں۔