حکومت پنجاب اور ٹرانسپورٹرز کے مذاکرات کامیاب، ہڑتال ختم، مسائل کے حل کیلئے اعلیٰ سطح کمیٹی تشکیل

لاہور(جانوڈاٹ پی کے)حکومتِ پنجاب اور ٹرانسپورٹرز کے درمیان مذاکرات کامیاب ہوگئے، جس کے بعد ٹرانسپورٹرز  نے ہڑتال ختم کرنے کا اعلان کر دیا۔

سینئر صوبائی وزیر مریم اورنگزیب اور ٹرانسپورٹرز کے نمائندوں کے درمیان ہونے والی بات چیت میں تمام اہم نکات پر اتفاق کیا گیا۔

مذاکرات کے بعد وزیرِاعلیٰ پنجاب مریم نواز نے ٹرانسپورٹرز کے مسائل کے حل کے لیے ایک اعلیٰ سطح کمیٹی تشکیل دے دی۔

 کمیٹی کی سربراہی مریم اورنگزیب کریں گی، جبکہ ٹرانسپورٹرز کے نمائندوں کو بھی اس میں شامل کیا گیا ہے۔ کمیٹی کا پہلا اجلاس کل مریم اورنگزیب اور ٹرانسپورٹر نمائندوں کی موجودگی میں ہوگا۔

مرکزی صدر گڈز ٹرانسپورٹ الائنس اور دیگر عہدیداروں نے مصالحتی قرارداد پر دستخط کیے۔ مریم اورنگزیب کا کہنا تھا کہ مسائل کو افہام و تفہیم سے حل کیا جائے گا، حکومت کا مقصد انسانی زندگی کا تحفظ اور شہریوں کے لیے بہتر حالات فراہم کرنا ہے۔

مذاکرات کے عمل میں ٹرانسپورٹرز کے دیگر نمائندے محمد ریاض خان تاجک، چوہدری مقبول حسین، رانا طارق مشتاق، ملک اعجاز، ملک معروف، سیف شاہ دین گجر، فیصل بشیر بھٹی، ملک جاوید اور حاجی پرویز اعوان بھی شریک تھے۔