پنجاب اور خیبرپختونخوا میں ٹریفک حادثات، 6 افراد جاں بحق، دھند کے باعث موٹروے ایم 5 عارضی طور پر بند

لاہور(جانوڈاٹ پی کے)پنجاب اور خیبرپختونخوا میں ٹریفک حادثات نے 6 افراد کی جان لے لی۔

خانیوال کے قریب موٹروے ایم 4 پر  بس اور ٹریلر  میں تصادم ہوا جس کے نتیجے میں  بس ہوسٹس جاں بحق جبکہ 4 مسافر زخمی ہوگئے۔ ترجمان موٹروے پولیس کے مطابق حادثہ ڈرائیور کو نیند آنے کی وجہ سے پیش آیا، بس لاہور سے ملتان جا رہی تھی۔

بہاولپور میں حاصل پور چشتیاں روڈ پر ٹریلر کی ٹکر سے 2 بھائی جاں بحق اور باپ زخمی ہوگیا۔ ادھر کوہاٹ میں بھی مسافر کوچ اور کار میں تصادم سے 3 افراد جان کی بازی ہار گئے۔

دوسری جانب پنجاب میں شدید دھند کا راج برقرار ہے، حد نگاہ کم ہونے کے باعث موٹروے ایم 5 ملتان سے ظاہر  پیر تک بند کردی گئی۔ موٹروے پولیس نے شہریوں کو احتیاطی تدابیر اختیار کرنے کی ہدایت کی ہے۔