پاک ایران آر سی ڈی شاہراہ پر خوفناک حادثہ، 7 افراد جاں بحق، 2 زخمی
کوئٹہ (جانوڈاٹ پی کے)بلوچستان میں پاک ایران آر سی ڈی شاہراہ پر یک مچ کے قریب پیش آنے والے خوفناک ٹریفک حادثے میں 7 افراد جاں بحق جبکہ 2 شدید زخمی ہو گئے۔ حادثہ ضلع چاغی کے علاقے یک مچ کے قریب دو گاڑیوں کے آمنے سامنے تصادم کے نتیجے میں پیش آیا۔
حادثے کی اطلاع ملتے ہی پولیس کے اعلیٰ حکام بھاری نفری کے ہمراہ اور ریسکیو ٹیمیں فوری طور پر موقع پر پہنچ گئیں۔ امدادی کارروائی کے دوران جاں بحق افراد کی لاشوں اور زخمیوں کو قریبی ہسپتال منتقل کیا گیا، جہاں زخمیوں کی حالت تشویشناک بتائی جا رہی ہے۔
پولیس حکام کے مطابق حادثے کی وجوہات جاننے کے لیے تحقیقات کا آغاز کر دیا گیا ہے، جبکہ ذمہ داروں کے خلاف قانون کے مطابق کارروائی کی جائے گی۔ ضروری قانونی کارروائی مکمل ہونے کے بعد لاشیں ورثا کے حوالے کر دی جائیں گی۔
