برطانیہ میں بھارتی خاتون نے ٹپ نہ دینے پر مسافروں خاتون کو گاڑی میں بند کردیا

لندن(جانو ڈاٹ پی کے)برطانیہ میں بھارتی خاتون نے ٹپ نہ دینے پر مسافروں خاتون کو گاڑی میں بند کردیا۔برطانیہ میں اوبر سروس سے متعلق ایک تشویشناک واقعہ سامنے آیا ہے جہاں ایک بھارتی نژاد خاتون اوبر ڈرائیور نے مبینہ طور پر مسافر خاتون کو ٹِپ نہ دینے پر گاڑی میں ہی لاک کر دیا۔ واقعے نے سوشل میڈیا اور عوامی حلقوں میں شدید تشویش پیدا کر دی ہے۔

تفصیلات کے مطابق مسافر خاتون نے اپنی منزل پر پہنچنے کے بعد ٹِپ دینے سے انکار کیا اور ڈرائیور کو بتایا کہ اوبر کی پالیسی کے مطابق ٹِپ دینا اختیاری (Optional) ہوتا ہے۔ تاہم بھارتی خاتون ڈرائیور اس بات پر بضد رہیں کہ ٹِپ دینا لازمی ہے اور اسی بات پر دونوں کے درمیان تلخ کلامی شروع ہو گئی۔

مسافر خاتون کا کہنا ہے کہ ڈرائیور نے غصے میں آ کر گاڑی کے دروازے لاک کر دیے اور انہیں باہر نکلنے سے روک دیا۔ مسافر بار بار یہ وضاحت کرتی رہیں کہ ٹِپ دینا کوئی قانونی تقاضا نہیں، مگر ڈرائیور اپنے مؤقف پر قائم رہیں۔

واقعے کی ویڈیو اور بیان سامنے آنے کے بعد سوشل میڈیا صارفین نے اوبر انتظامیہ سے فوری کارروائی کا مطالبہ کیا ہے۔ عوامی ردعمل میں کہا جا رہا ہے کہ مسافروں کی آزادی اور سلامتی کے ساتھ کسی بھی صورت سمجھوتہ نہیں کیا جا سکتا۔

اوبر حکام کی جانب سے تاحال واقعے پر باضابطہ بیان سامنے نہیں آیا، تاہم توقع کی جا رہی ہے کہ واقعے کی مکمل تحقیقات کے بعد ذمہ دار ڈرائیور کے خلاف کارروائی عمل میں لائی جائے گی۔

یہ واقعہ ایک بار پھر اس بات کی یاد دہانی ہے کہ رائیڈ ہیلنگ سروسز میں مسافروں کے حقوق اور تحفظ کو یقینی بنانا کتنا ضروری ہے۔