پاکستان نے ٹی ٹوئنٹی ورلڈ کپ میں شرکت کافیصلہ کرلیا،آئی سی سی سے احتجاج کیا جائے گا

اسلام آباد (جانوڈاٹ پی کے)پاکستان نے ٹی ٹوئنٹی ورلڈ کپ میں شرکت کرنے کا فیصلہ کرلیا۔یہ فیصلہ وزیر اعظم شہبازشریف اوروزیر داخلہ کی ملاقات میں کیا گیا۔ملاقات میں یہ طے پایا کہ پاکستان آئی سی سی کے رویے پر اپنا احتجاج ریکارڈ کرائے گا۔

قبل ازیں چیئرمین پی سی بی محسن نقوی نے قومی کرکٹرز سے گفتگو کرتے ہوئے کہا کہ بنگلہ دیش کرکٹ بورڈ کا مؤقف اصولی بنیادوں پر تھا اور پاکستان نے کرکٹ کے سنہری اصولوں کو مدِنظر رکھتے ہوئے بنگلہ دیش کی حمایت کی۔ انہوں نے کہا کہ پاکستانی کھلاڑی باصلاحیت ہیں اور کسی بھی میدان میں کامیابی ٹیم ورک سے حاصل ہوتی ہے۔

محسن نقوی کا کہنا تھا کہ سیاست زدہ کرکٹ کسی کے مفاد میں نہیں اور ورلڈ کپ سے متعلق حکومت پاکستان جو بھی فیصلہ کرے گی، پی سی بی اس پر مکمل عملدرآمد کرے گا۔

واضح رہے کہ انٹرنیشنل کرکٹ کونسل (آئی سی سی) نے بنگلہ دیش کو ٹی ٹوئنٹی ورلڈ کپ سے باہر کرتے ہوئے اس کی جگہ اسکاٹ لینڈ کو ٹورنامنٹ میں شامل کرنے کا باضابطہ اعلان کر دیا ہے۔

یاد رہے کہ ٹی ٹوئنٹی ورلڈ کپ کا آغاز 7 فروری سے ہوگا، جبکہ ایونٹ میں پاکستان کے میچز سری لنکا میں شیڈول کیے گئے ہیں۔