گووندا اور میرے درمیان طلاق نہیں ہوئی، ہم ساتھ رہتے ہیں، سنیتا آہوجا

ممبئی(مانیٹرنگ ڈیسک) بالی ووڈ کے لیجنڈ اداکار گووندا کی اہلیہ سنیتا آہوجا نے حال ہی میں ازدواجی مسائل اور شوہر کے مبینہ افیئرز کے حوالے سے کھل کر بات کی ہے۔

ایک حالیہ پوڈکاسٹ میں سنیتا آہوجا نے گووندا سے علیحدگی کی خبروں کو مسترد کرتے ہوئے کہا کہ نہ تو ان کی طلاق ہوئی ہے اور نہ ہی اس کا کوئی ارادہ ہے، دونوں اب بھی ساتھ رہتے ہیں۔

سنیتا آہوجا نے مزید کہا کہ وہ شوہر کی زندگی میں آنے والی دیگر خواتین کے معاملات کو نظرانداز نہیں کرتیں۔ انہوں نے واضح کیا کہ ان کا رشتہ مضبوط ہے، تاہم اگر بے وفائی ثابت ہوئی تو وہ معاف نہیں کریں گی۔

گفتگو کے دوران سنیتا نے شوخ انداز میں خاندانی ذمہ داریوں اور بچوں کے مستقبل پر بھی بات کی اور اپنے بیٹے یش وردھن آہوجا کے لیے خاطرخواہ کردار ادا نہ کرنے پر گووندا پر ناراضگی بھی ظاہر کی۔

واضح رہے کہ گووندا اور سنیتا آہوجا کی شادی 1987 میں ہوئی تھی اور ان کے دو بچے ہیں، ٹینا اور یش وردھن آہوجا۔