اسپین میں ٹرینوں کا ہولناک تصادم، 21 مسافر جاں بحق، 100 سے زائد زخمی

میڈرڈ(مانیٹرنگ ڈیسک) یورپی ملک اسپین کے جنوبی علاقے میں ایک تیز رفتار مسافر ٹرین اچانک پٹری سے بے قابو ہو کر مخالف سمت سے آنے والی ٹرین سے ٹکرا گئی، جس کے نتیجے میں دونوں ٹرینیں الٹ گئیں اور خوفناک حادثہ پیش آیا۔

برطانوی خبر ایجنسی کے مطابق شدید تصادم کے باعث 21 مسافر موقع پر ہی جاں بحق ہو گئے، جبکہ 100 سے زائد افراد زخمی ہوئے۔ زخمیوں میں سے 21 کی حالت تشویشناک بتائی جا رہی ہے۔

حادثے کا شکار ہونے والی میڈرڈ سے ہیولوا جانے والی ٹرین کا ڈرائیور بھی جانبر نہ ہو سکا۔ ذرائع کے مطابق حادثے کے وقت ایک ٹرین میں 300 سے زائد جبکہ دوسری ٹرین میں تقریباً 100 مسافر سوار تھے۔

تصادم کی شدت اتنی زیادہ تھی کہ متعدد ڈبے ایک دوسرے پر چڑھ گئے اور ریلوے ٹریک کئی مقامات سے اکھڑ گیا۔

حادثے کے فوراً بعد ریسکیو ٹیمیں، فائر بریگیڈ اور طبی عملہ جائے وقوعہ پر پہنچ گیا، زخمیوں کو قریبی اسپتالوں میں منتقل کیا گیا جبکہ متاثرہ روٹس پر ٹرین سروس عارضی طور پر معطل کر دی گئی۔

حکام کا کہنا ہے کہ حادثے کی وجوہات جاننے کے لیے باضابطہ تحقیقات کا آغاز کر دیا گیا ہے۔