سندھ طاس معاہدے کی معطلی اور پانی کو اسٹریٹجک ہتھیار بنانا خطرناک ہے، امریکی جریدہ
واشنگٹن (جانوڈاٹ پی کے) امریکی جریدے دی نیشنل انٹرسٹ نے بھارتی اقدامات کے خلاف پاکستان کے موقف کی بھرپور حمایت کرتے ہوئے کہا ہے کہ بھارت کی جانب سے سندھ طاس معاہدے کی معطلی جنوبی ایشیا میں پانی کی سیاست کو خطرناک رخ دے سکتی ہے اور انسانی بحران کا سبب بن سکتی ہے۔
رپورٹ میں بتایا گیا کہ بھارت کا دُلہستی اسٹیج II منصوبہ سندھ طاس معاہدے کے خلاف ایک قدم ہے اور بھارت پانی کو اسٹریٹجک ہتھیار کے طور پر استعمال کر رہا ہے۔ امریکی جریدے کے مطابق آبی ڈیٹا کی فراہمی روکنا بین الاقوامی قوانین کی خلاف ورزی ہے اور عالمی ثالثی عدالت نے واضح کیا ہے کہ بھارت معاہدے کو یکطرفہ طور پر معطل نہیں کر سکتا۔
دی نیشنل انٹرسٹ کی رپورٹ میں مزید کہا گیا کہ سندھ طاس معاہدہ جنوبی ایشیا میں فوڈ سکیورٹی کی بنیادی ضمانت ہے، اور بھارت پر مغربی دریاؤں کا پانی پاکستان کو فراہم کرنا قانونی طور پر لازم ہے۔ پانی کو ہتھیار بنانے کی بھارتی کوشش بین الاقوامی قوانین اور عالمی عدالتوں کے نزدیک ناقابل قبول ہے۔
