وزیرِاعلیٰ سہیل آفریدی کا کمسن بچے کی شکایت پر لیڈی ریڈنگ ہسپتال کا ہنگامی دورہ

پشاور (جانوڈاٹ پی کے) وزیراعلیٰ خیبر پختونخوا سہیل خان آفریدی نے سوشل میڈیا پر سامنے آنے والی ایک کمسن بچے کی تشویشناک حالت سے متعلق شکایت کا فوری نوٹس لیتے ہوئے لیڈی ریڈنگ ہسپتال کے ایمرجنسی چلڈرن وارڈ کا دورہ کیا۔

وزیراعلیٰ نے بچے کے اہل خانہ سے ملاقات کی اور واقعے کی مکمل انکوائری کی۔ اس موقع پر متعلقہ ڈاکٹروں نے آگاہ کیا کہ بچوں کے آئی سی یو میں بیڈز کی کمی کے باعث مریض کو خیبر ٹیچنگ ہسپتال منتقل کرنا ناگزیر ہے، جہاں علاج کیلئے بیڈ دستیاب ہے۔

سہیل آفریدی نے فوری طور پر ایمبولینس کی فراہمی اور مریض کی بروقت منتقلی کے احکامات جاری کیے۔

وزیراعلیٰ نے بچوں کے آئی سی یو میں نئے بیڈز کی فراہمی، فوری طور پر فیبری کیٹڈ ایکسٹینشن رومز کے قیام اور ہنگامی بنیادوں پر ہسپتال کی مجموعی صلاحیت بڑھانے کی ہدایت کی۔ انہوں نے واضح کیا کہ اگر سرکاری ہسپتالوں میں بیڈ دستیاب نہ ہوں تو نجی ہسپتالوں میں علاج کا بندوبست کیا جائے گا اور تمام اخراجات حکومت برداشت کرے گی۔

مزید برآں وزیراعلیٰ نے ہسپتالوں میں بیڈ کی دستیابی جانچنے کے لیے سنٹرلائزڈ ہسپتال سسٹم کو مؤثر بنانے، پرائمری ہیلتھ کیئر نظام کی ازسرِنو بہتری اور ڈاکٹروں کے ہاسٹلز میں کمروں کی کمی کا بھی نوٹس لیتے ہوئے متعلقہ حکام کو فوری اقدامات کی ہدایت کی۔ اس دوران دیگر مریضوں کے مسائل بھی موقع پر حل کرنے کے احکامات جاری کیے گئے۔

وزیراعلیٰ سہیل آفریدی کا کہنا تھا کہ خیبر پختونخوا حکومت ڈاکٹرز، طبی عملے اور اساتذہ برادری کے ساتھ کھڑی ہے اور ان کی فلاح و سہولت حکومت کی اولین ترجیح ہے۔