کارپوریٹ نوکری چھوڑ کر اداکارہ بنیں ، والدہ کی سخت مخالفت کے باوجود خواب پورے کیے: سیانی گپتا

ممبئی(جانوڈاٹ پی کے)بالی ووڈ اداکارہ سیانی گپتا نے کہا ہے کہ جب میں نے فلموں میں اداکاری شروع کی تو والدہ نے اس پر کلائی کاٹ لینے کی دھمکی دی اور کہا کہ اداکاروں کو بدکردار اور غلط پیشے سے منسلک کیا جاتا ہے۔

کولکتہ سے تعلق رکھنے والی 40 سالہ اداکارہ کے مطابق ان کی والدہ اس بات پر بالکل راضی نہیں تھیں کہ میں اپنی اچھی تنخواہ والی نوکری چھوڑ کر اداکاری کو بطور پیشہ اختیار کروں، اس صورتحال کے باعث میں ایک ماہ تک اپنی والدہ سے بات نہیں کر سکی۔

ایک بھارتی میڈیا ادارے سے گفتگو میں سایانی گپتا کا مزید کہنا تھا کہ وہ اس وقت اداکارہ بننا چاہتی تھیں اور اس بارے میں مزید سیکھنا چاہتی تھیں، لیکن اس لیے مجھے کم عمری میں ملنے والی اپنی اعلیٰ تنخواہ والی کارپوریٹ نوکری چھوڑنی پڑی، یہ ایک ایسا فیصلہ تھا جس کی میری والدہ نے حمایت نہیں کی۔

انہوں نے مزید بتایا کہ جب انہیں اداکاری کی تعلیم حاصل کرنے کے لیے ایف ٹی آئی آئی میں داخلہ ملا تو اس کے بعد ان کی والدہ نے ایک ماہ تک ان سے بات نہیں کی۔ جب میں ٹریننگ کے لیے پونا جانے لگی تو والدہ نے کہا اگر تم وہاں گئیں تو میں اپنی کلائی کاٹ لوں گی۔ وہ ڈیڑھ سال میرے لیے انتہائی بوریت بھرے تھے۔

سایانی نے 2012 میں فلم سیکنڈ میرج ڈاٹ کام کے ذریعے ہندی فلموں میں اپنا کیریئر شروع کیا۔ انہیں 2015 میں فلم مارگریٹا ود اے اسٹرا میں معاون کردار سے کافی شہرت ملی۔ اسکے علاوہ انھوں نے فین، جولی ایل ایل بی 2 اور آرٹیکل 15 جیسی فلموں میں کام کیا۔ دسمبر  2025  میں وہ فور مور شاٹس پلیز، سیزن 4 میں دیکھی گئیں۔