عالمی بینک کا سندھ فلڈ منصوبے پر اطمینان صوبائی حکومت کی کارکردگی کا ثبوت ہے، شرجیل میمن

کراچی (جانوڈاٹ پی کے)سندھ کے سینئر وزیر شرجیل انعام میمن نے کہا ہے کہ عالمی بینک کی جانب سے سندھ فلڈ ایمرجنسی ریہیبلیٹیشن منصوبے کی کارکردگی کو تسلی بخش قرار دینا صوبائی حکومت کی مؤثر منصوبہ بندی کا ثبوت ہے۔

شرجیل میمن کے مطابق اس منصوبے کے تحت صوبے بھر میں اہم انفراسٹرکچر کی بحالی کے ذریعے 7.2 ملین سے زائد افراد مستفید ہوئے، جن میں 3.4 ملین خواتین بھی شامل ہیں۔

انہوں نے کہا کہ سندھ حکومت نے سیلاب متاثرین کی بحالی کو اولین ترجیح دی اور محدود وسائل کے باوجود شفافیت، رفتار اور مؤثر عملدرآمد کو یقینی بنایا۔ عالمی بینک کی جانب سے پیش رفت کو تسلی بخش قرار دینا اس بات کی تصدیق ہے کہ حکومت سندھ درست سمت میں آگے بڑھ رہی ہے۔

سینئر وزیر نے مزید کہا کہ فلڈ ایمرجنسی ریہیبلیٹیشن منصوبہ متاثرہ علاقوں میں بنیادی سہولیات کی بحالی کے ساتھ معاشی اور سماجی استحکام میں بھی اہم کردار ادا کر رہا ہے۔