بالائی علاقوں میں شدید سردی، جھیلیں جم گئیں،پہاڑ سفید ہو گئے،سیاحتی مقامات کی رونقیں بحال

اسلام آباد(جانوڈاٹ پی کے) ملک کے بالائی علاقے بدستور شدید سردی کی لپیٹ میں ہیں، جھیلیں منجمد ہو چکی ہیں جبکہ برفباری کے باعث پہاڑوں نے سفید چادر اوڑھ لی ہے، جس سے آزاد کشمیر، خیبرپختونخوا اور گلگت بلتستان کے سیاحتی مقامات کی خوبصورتی میں اضافہ ہو گیا ہے۔

اسلام آباد میں خشک سردی اور دھند کا راج رہا، شہر کا مطلع دن بھر ابر آلود رہا۔ محکمہ موسمیات کے مطابق وفاقی دارالحکومت میں بارش کا کوئی امکان نہیں۔ لاہور میں بھی سردی کی شدت میں اضافہ ہوا جبکہ دھند کی شدت میں واضح کمی ریکارڈ کی گئی، شہر کا کم سے کم درجہ حرارت 7 ڈگری سینٹی گریڈ رہا۔

ملکہ کوہسار مری میں برفباری کے بعد دھوپ نکلنے سے نظارے مزید دلفریب ہو گئے۔ خوشگوار موسم سے لطف اندوز ہونے کیلئے سیاحوں کی بڑی تعداد نے تفریحی مقامات کا رخ کیا اور قدرت کے حسین مناظر سے خوب محظوظ ہوئے۔

ہزارہ ڈویژن کے بالائی علاقوں میں دوبارہ برفباری کا سلسلہ شروع ہو گیا۔ چھٹی کے روز نتھیا گلی میں موجود سیاحوں نے سنو فال کو خوب انجوائے کیا۔ ادھر مالم جبہ کا موسم بھی حسین ہو گیا جہاں سیاحوں کی بڑی تعداد نے وادی کا رخ کیا اور برفباری و قدرتی حسن سے لطف اندوز ہوئے۔

وادی شگر میں موسم سرما کے ساتھ سال کی پہلی برفباری کا آغاز ہو گیا جس سے سردی کی شدت میں اضافہ ہو گیا۔ برفباری کے باعث ندی نالوں میں پانی کے بہاؤ میں کمی آ گئی جبکہ سیاحوں کے چہرے خوشی سے کھل اٹھے۔ دوسری جانب کوئٹہ سمیت بلوچستان کے شمالی اور وسطی اضلاع میں بھی سردی کی شدت بڑھ گئی ہے۔