سرگودھا کمشنر کا تعلیمی معیار بہتر بنانے کے لیے سرکاری سکولوں کا دورہ، اضافی کلاس رومز اور بنیادی ڈھانچے کا جائزہ
سرگودہا (جانوڈاٹ پی کے) کمشنر جہانزیب اعوان کی زیر صدارت ایک اجلاس منعقد ہوا جس میں ڈویژن کے چاروں اضلاع کے سرکاری سکولوں میں دستیاب سہولیات، اضافی کلاس رومز، چار دیواری اور دیگر تعلیمی و بنیادی ڈھانچے کے امور کا تفصیلی جائزہ لیا گیا۔ اجلاس میں چاروں اضلاع کے سی ای او ایجوکیشن، اے ڈی سی جی، اور ڈپٹی ڈائریکٹر ڈیویلپمنٹ نے شرکت کی۔ اجلاس میں سی ای اوز نے اپنے اضلاع میں جاری تعلیمی منصوبوں اور سکیموں پر پیشرفت کی تفصیلی بریفنگ دی، جس میں اضافی کلاس رومز، سہولیات کی فراہمی اور چار دیواری کی تعمیر شامل تھیں۔
بعد ازاں، کمشنر جہانزیب اعوان نے گورنمنٹ پرائمری سکول 71 شمالی کا دورہ کر کے تدریسی عمل کا جائزہ لیا اور طلباء کی تعلیم و تربیت کے معیار کی نگرانی کی۔ کمشنر نے گورنمنٹ پرائمری سکول مجاہد کالونی میں زیر تعمیر اضافی کلاس رومز کا معائنہ کیا اور کام کی رفتار اور معیار کا جائزہ لینے کے بعد متعلقہ حکام کو ہدایات جاری کیں کہ تمام ترقیاتی کام مقررہ وقت میں مکمل کیے جائیں۔ کمشنر نے اس موقع پر کہا کہ سرکاری سکولوں میں بچوں کے لیے موزوں تعلیمی ماحول فراہم کرنا حکومت کی اولین ترجیح ہے۔ انہوں نے حکام کو ہدایت دی کہ اضافی کلاس رومز، صاف ستھری سہولیات اور حفاظتی اقدامات کو جلد از جلد مکمل کیا جائے تاکہ طلباء بلا رکاوٹ تعلیم حاصل کر سکیں۔ کمشنر نے اس بات پر زور دیا کہ مقامی حکام وقتاً فوقتاً اسکولوں کا معائنہ کریں اور پیشرفت رپورٹ بذریعہ اجلاس پیش کریں تاکہ اسکولوں میں معیار تعلیم بہتر بنایا جا سکے۔
