سرگودھا محکمہ ہائی ویز کی 31 ارب 86 کروڑ روپے کی 27 ترقیاتی سکیموں پر کام جاری ہے۔کمشنر

سرگودہا (جانوڈاٹ پی کے) محکمہ ہائی ویز کی 31 ارب 86 کروڑ روپے کی 27 ترقیاتی سکیموں پر کام جاری ہے۔ ان میں سالانہ ترقیاتی پروگرام کے تحت 18 سکیمیں، روڈ بحالی پروگرام کی 8 سکیمیں اور پی ایس ڈی پی کی ایک سکیم شامل ہیں۔ ان سکیموں پر پیشرفت کا جائزہ کمشنر سرگودہا ڈویژن جہانزیب اعوان کی زیر صدارت اجلاس میں لیا گیا، جس میں ایس ای ہائی ویز رانا عابد، ایکسین ملک گلفام اعوان، ڈائریکٹر ڈویلپمنٹ بلال حسن اور دیگر متعلقہ افسران نے شرکت کی۔کمشنر سرگودہا نے کہا کہ ترقیاتی منصوبوں کی بروقت تکمیل عوام کے مفاد میں ہے۔ انہوں نے ہدایت کی کہ کام کو معیار کے مطابق اور مقررہ وقت پر مکمل کیا جائے۔ ہر سکیم کی باقاعدہ مانیٹرنگ کی جائے تاکہ شہریوں کو بہترین سہولیات فراہم کی جا سکیں۔ انہوں نے کہا کہ وزیر اعلیٰ پنجاب خاص طور پر روڈ سیکٹر پر توجہ دے رہی ہیں، اس لیے تمام ترقیاتی سکیمیں مقررہ وقت میں مکمل کرنا اولین ترجیح ہے۔ ضلعی افسران باقاعدہ وزٹ اور مانیٹرنگ کے ذریعے کام کی مکمل نگرانی کریں تاکہ منصوبے معیار اور وقت کے مطابق مکمل ہوں۔