لیہ چوک سرورشہید: تیز رفتار ٹرالر اور موٹر سائیکلوں میں تصادم، سکول جاتے 5 کم سن بچے جاں بحق

چوک سرورشہید (جانوڈاٹ پی کے) لیہ روڈ مان پمپ کے قریب ایک تیز رفتار ٹرالر اور دو موٹر سائیکلوں کے درمیان خوفناک تصادم کے نتیجے میں پانچ کم سن بچے موقع پر ہی جاں بحق ہو گئے۔ واقعہ اس وقت پیش آیا جب بچے سکول جا رہے تھے۔

حادثے کی اطلاع ملتے ہی ریسکیو اور تھانہ سٹی سرورشہید پولیس موقع پر پہنچ گئے اور جاں بحق بچوں کی لاشوں کو تحصیل ہیڈ کوارٹر ہسپتال منتقل کیا گیا۔ پولیس نے حادثے کی تحقیقات شروع کر دی ہیں، جبکہ علاقے میں سوگ کی فضا قائم ہے۔

جاں بحق بچوں کی شناخت عبداللہ (5 سال) اور عبدالرحمن (7 سال) کے نام سے ہوئی، جو آپس میں بھائی تھے۔ دیگر متاثرہ بچوں میں عبدالباسط (17 سال) اور دعا فاطمہ شامل ہیں، جو بہن بھائی تھے، جبکہ محمد عادل (16 سال) بھی حادثے میں ہلاک ہو گیا۔ تمام بچے چک نمبر 560 کے رہائشی تھے۔

اہلِ علاقہ نے افسوسناک واقعے پر شدید غم و غصے کا اظہار کرتے ہوئے حکام سے مطالبہ کیا ہے کہ ٹریفک قوانین پر سختی سے عمل درآمد یقینی بنایا جائے تاکہ مستقبل میں ایسے المناک حادثات روکے جا سکیں۔