اسلام آباد میں ایپ بیسڈ رائیڈ ہیلنگ سروسز کو قانونی دائرے میں لانے کا فیصلہ
اسلام آباد (جانوڈاٹ پی کے)وفاقی دارالحکومت میں پہلی مرتبہ ایپ بیسڈ ٹیکسی اور آن لائن رائیڈ ہیلنگ سروسز کو قانونی دائرے میں لانے کا فیصلہ کر لیا گیا ہے۔ سینیٹ نے آن لائن رائیڈ بُکنگ کے لیے نیا قانونی فریم ورک متعارف کرانے والا بل منظور کر لیا ہے۔
بل کے مطابق، آن لائن رائیڈ ہیلنگ سروسز سے وابستہ ڈرائیورز کے لیے متعلقہ اتھارٹی سے رجسٹریشن لازمی ہوگی اور بغیر رجسٹریشن اسلام آباد میں کسی بھی رائیڈ سروس کی اجازت نہیں ہوگی۔ رائیڈ ہیلنگ کمپنیوں کو آپریشن شروع کرنے کے لیے باقاعدہ آپریشن سرٹیفکیٹ حاصل کرنا ہوگا۔
ڈرائیورز کے لیے ویلڈ ڈرائیونگ لائسنس اور خصوصی اجازت نامہ لازمی ہوگا جبکہ گاڑیوں کی رجسٹریشن اور سالانہ فٹنس سرٹیفکیٹ بھی شرط ہے۔ رائیڈ ہیلنگ کمپنیوں کو ڈرائیورز اور گاڑیوں کا مکمل ریکارڈ محفوظ رکھنا اور متعلقہ حکام کو ریئل ٹائم ڈیٹا فراہم کرنا ہوگا۔
بل کے متن کے مطابق قانون سازی کا مقصد مسافروں کے تحفظ کو یقینی بنانا، شفاف نظام قائم کرنا اور رائیڈ ہیلنگ سیکٹر کو منظم کرنا ہے۔ واضح رہے کہ رائیڈ شیئرنگ سروسز طویل عرصے سے بغیر کسی جامع قانونی فریم ورک کے کام کر رہی تھیں، جس کے باعث مختلف انتظامی اور حفاظتی مسائل سامنے آ رہے تھے۔
