ملکہ برطانیہ بھی جنسی ہراسانی کا شکار

لندن (مانیٹرنگ ڈیسک) ملکہ برطانیہ کمیلا نے انکشاف کیا ہے کہ کم عمری میں انہیں ٹرین میں سفر کے دوران اجنبی شخص کی جانب سے ہراسانی کا سامنا کرنا پڑا تھا۔

بی بی سی ریڈیو کو انٹرویو دیتے ہوئے ملکہ کمیلا نے نوجوانی میں پیش آئے واقعے کا ذکر کرتے ہوئے کہا کہ وہ ایک دن ٹرین میں سفر کے دوران کتاب پڑھ رہی تھی کہ اس دوران ٹرین میں موجود ایک اجنبی شخص نے اچانک ان پر حملہ کردیا اور انہیں ہراساں کرنا شروع کیا۔

ملکہ نے بتایا کہ اُس وقت میں نے اپنی والدہ کی نصیحت یاد رکھی اور حاضر دماغی کا مظاہرہ کرتے ہوئے جوتا اتار کر اس شخص کو دے مارا اور مزاحمت کے بعد ٹرین سے اتر گئی، تب میری عمر 16 یا 17 سال تھی اور یہ واقعہ کئی سالوں تک میرے لیے صدمے کا باعث بنا رہا۔

کوئین کمیلا کا مزید کہنا تھا کہ جب بھی کوئی گھریلو تشدد کے موضوع پر بات کرتا ہے تو مجھے یہ واقعہ یاد آ جاتا ہے جو مجھے بہت پریشان کرتا ہے۔