پاکستان سنی تحریک کے سربراہ ثروث اعجاز قادری کے گھر پر چھاپہ،بھتہ خوری میں ملوث 2 ملزمان گرفتار

کراچی(جانوڈاٹ پی کے)سندھ پولیس کے اسپیشل انوسٹیگیشن یونٹ نے پاکستان سنی تحریک کے سربراہ ثروث اعجاز قادری کے گھر پر چھاپہ مار کر بھتہ خوری کی سنگین وارداتوں میں ملوث دو ملزمان کو گرفتار کرلیا۔

ایس ایس پی ایس آئی یو ڈاکٹر عمران نے بتایا کہ ناظم آباد ایک نمبر پر واقع قادری ہاؤس پر پولیس اور ایس آئی یو نے خفیہ اطلاع پر چھاپہ مار کر بھتہ خوری میں ملوث دو ملزمان کو گرفتار کیا ہے۔

انہوں نے بتایا کہ ملزمان کی شناخت جواد اور ملا شاہزیب کے نام سے ہوئی جن کا تعلق بدنام زمانہ بھتہ خور صمد کاٹھیاواڑی گروپ سے ہے۔

چھاپے کے دوران پولیس نے بڑی تعداد میں اسلحہ بھی برآمد کیا۔

ایس ایس پی ایس آئی یو کے مطابق گرفتار ملزمان بھتہ خوری کی کئی وارداتوں میں ملوث ہیں۔پولیس نے چھاپے میں سربراہ سنی تحریک اعجاز قادری کو گرفتار نہیں کیا جبکہ حراست میں لیے گئے افراد سے تفتیش جاری ہے۔

دریں اثناء کہ اعلامیہ ایس آئی یو کے مطابق  ایس آئی یو / سی آئی اے کی اہم کارروائی ریحان نامی گرفتار شدہ ملزم جوکہ جمشید کوارٹر میں بھتہ اور فائرنگ میں ملوث تھا،اس کی نشاندہی پر قادری ہاؤس پر چھاپے میں جواد قادری عرف خواجہ اور شاہزیب ملا سمیت متعدد ملزمان گرفتارکیا۔

ایس ایس پی ایس آئی یو عمران خان کے مطابق ملزمان سے بھاری تعداد میں اسلحہ برآمد کرلیا گیا یے۔ملزمان کا سابقہ کریمنل ریکارڈ بھی موجود ہے۔اس معاملہ پر مزید تفتیش جاری ہے۔

ایس ایس پی عمران خان نے بتایا کہ گرفتار ملزمان بھتہ خور گروہ کے سرغنہ صمد کاٹھیاواڑی اور وصی اللہ لاکھو کا نیٹ ورک چلاتے اور متعدد مقدمات میں مطلوب تھے۔

دوسری جانب ترجمان پاکستان سنی تحریک نے کہا ہے کہ قادری ہاؤس پر پولیس کی چڑھائی کی مذمت کرتے ہیں ۔چھاپے میں چادر چار دیواری کا تقدس پامال کیا گیا۔ پاکستان سنی تحریک کو قادری ہاؤس پر پولیس کے چھاپے پر شدید تحفظات ہیں۔

ترجمان نے کہا کہ طاقت کے استعمال سے حق سچ کی آواز دبائی نہیں جاسکتی۔ مرکزی ترجمان  نے دعوی کیا کہ قادری ہاؤس سے پاکستان سنی تحریک کے چیئرمین انجینیئر محمد ثروت اعجاز قادری کو گرفتار کیا گیا۔

پولیس کی جانب سے کاروائی چھپانے کے لیے قادری ہاؤس کے کیمروں کو بھی توڑ دیا گیا۔ پولیس کے چھاپے کے دوران کراچی ڈویژن کے عہدے داران اور کارکنان کو گرفتار کیا گیا۔ ترجمان نے کہا کہ پولیس نے ثروت اعجاز قادری سمیت 20 سے زائد ذمہ داران کارکنان کو گرفتار کیاہے۔