پنجاب بار کونسل: احسن بھون گروپ کا کلین سویپ، وائس چیئرمین اور چیئرمین ایگزیکٹو کمیٹی منتخب
لاہور (جانوڈاٹ پی کے) پاکستان بار کونسل کے الیکشن میں کامیابی کے بعد احسن بھون گروپ نے پنجاب بار کونسل میں بھی اپنی برتری برقرار رکھتے ہوئے وائس چیئرمین اور چیئرمین ایگزیکٹو کمیٹی کے عہدوں پر کامیابی حاصل کر لی۔
پنجاب بار کونسل کے وائس چیئرمین اور چیئرمین ایگزیکٹو کمیٹی کے انتخاب کے لیے پنجاب بار کونسل کی عمارت میں ووٹنگ کا عمل مکمل ہوا، جہاں مجموعی طور پر 75 ووٹرز نے حقِ رائے دہی استعمال کیا۔
الیکشن کے نتائج کے مطابق احسن بھون گروپ کے امیدوار خواجہ قیصر 56 ووٹ لے کر وائس چیئرمین پنجاب بار کونسل منتخب ہوئے، جبکہ فخر حیات بھی 56 ووٹ حاصل کر کے چیئرمین ایگزیکٹو کمیٹی پنجاب بار کونسل منتخب قرار پائے۔ یوں احسن بھون گروپ نے دونوں اہم عہدوں پر واضح اکثریت سے کامیابی حاصل کی۔
کامیاب امیدواروں نے اس موقع پر کہا کہ وہ آئین و قانون کی بالادستی، عدلیہ کی آزادی اور وکلاء برادری کے حقوق کے تحفظ کے لیے اپنی جدوجہد جاری رکھیں گے۔
تقریب میں وفاقی وزیر قانون اعظم نذیر تارڑ، انڈیپینڈنٹ گروپ کے سربراہ احسن بھون، وائس چیئرمین پاکستان بار کونسل پیر مسعود چشتی، ممبر پاکستان بار کونسل عامر سعید راں سمیت دیگر سینئر وکلاء نے شرکت کی اور کامیاب امیدواروں کو پھولوں کے ہار پہنا کر مبارکباد دی۔
دوسری جانب حامد خان گروپ کے امیدوار عمران حسین چھٹہ اور فیصل ملک 18، 18 ووٹ لے کر دوسرے نمبر پر رہے۔ پنجاب بار کونسل کے دونوں عہدوں کے لیے 75 ممبران نے ووٹ کاسٹ کیے۔
