تحریکِ انصاف کی 23 رکنی نئی سیاسی کمیٹی قائم،نوٹیفیکیشن جاری

اسلام آباد(جانوڈاٹ پی کے)پاکستان تحریکِ انصاف نے 23 اراکین پر مشتمل نئی سیاسی کمیٹی قائم کر دی، جس کا باقاعدہ نوٹیفکیشن جاری کر دیا گیا ہے۔

نئی تشکیل شدہ کمیٹی پارٹی کی اعلیٰ ترین فیصلہ ساز اتھارٹی قرار پائے گی جو اہم سیاسی فیصلوں، پالیسی سازی اور حکمتِ عملی کی منظوری دے گی۔

نوٹیفکیشن کے مطابق کمیٹی میں اہم سیاسی و پارلیمانی شخصیات شامل ہیں جن میں بیرسٹر گوہر علی خان، سلمان اکرم راجا، فردوس شمیم نقوی اور شیخ وقاص اکرم شامل ہیں۔ اسی طرح وزیراعلیٰ خیبر پختونخوا سہیل آفریدی، عمر ایوب خان، شبلی فراز، علامہ راجا ناصر عباس اور محمود خان اچکزئی بھی کمیٹی کا حصہ ہوں گے۔

پنجاب اسمبلی کے اپوزیشن لیڈر معین قریشی اور ملک احمد خان بھچر کے علاوہ سجاد برکی، عالیہ حمزہ، جُنید اکبر، حلیم عادل شیخ اور داؤد کاکڑ بھی کمیٹی میں شامل کیے گئے ہیں۔

آزاد کشمیر اور گلگت بلتستان کی نمائندگی کے لیے خالد خورشید اور عبدالقیوم نیازی بھی کمیٹی کا حصہ بنے ہیں۔ علاوہ ازیں اسد قیصر، چیف وہپ قومی اسمبلی عامر ڈوگر، فوزیہ ارشد، کنول شوذب اور لال چند ملہی کو بھی کمیٹی میں ذمہ داری سونپی گئی ہے۔

نوٹیفکیشن کے مطابق نئی سیاسی کمیٹی پارٹی کی اعلیٰ ترین فیصلہ ساز فورم ہوگی جو پارٹی پالیسیوں، سیاسی حکمت عملی اور بڑے فیصلوں کا تعین کرے گی۔