پی ایس ایل کی2نئی ٹیموں کیلئے حیران کن بولیاں

لاہور(جانو ڈاٹ پی کے)پاکستان کرکٹ بورڈنے پاکستان سپر لیگ کی دو نئی ٹیموں کی فروخت کیلئے جاری کیے گئے ٹینڈر کے غیر معمولی اور حوصلہ افزا نتائج کا اعلان کیا ہے۔پی سی بی کے مطابق مقررہ تاریخ کے اندر12پارٹیوں نے باضابطہ طور پر بڈز جمع کروائیں۔ یہ بڈرز دنیا کے 5براعظموں سے تعلق رکھتے ہیں جن میں امریکا، آسٹریلیا، کینیڈا، متحدہ عرب امارات (یو اے ای) اور پاکستان شامل ہیں، جو پی ایس ایل کی عالمی مقبولیت اور کشش کا واضح ثبوت ہے۔بڈنگ کے اس مرحلے کے نتائج کا اعلان27 دسمبر کو کیا جائے گا۔ اگلے مرحلے میں ٹیکنیکلی کوالیفائیڈ بڈرز کو اوپن کمپیٹیشن بڈنگ کے ذریعے دو نئی ٹیمیں خریدنے کا موقع دیا جائے گا۔یہ مرحلہ8جنوری کو اسلام آباد کنونشن سینٹر میں منعقد ہوگا۔پاکستان کرکٹ بورڈ اس عمل کو شفاف،مسابقتی اور عالمی معیار کے مطابق مکمل کرنے کے لیے پُرعزم ہے، تاکہ پاکستان سپر لیگ کی مزید توسیع اور ترقی کو یقینی بنایا جا سکے۔