لاہور رنگ روڈ پر رشوت لیتے پولیس اہلکار کی ویڈیو وائرل، ڈی آئی جی آپریشنز نے گرفتار کرا دیا
لاہور (جانوڈاٹ پی کے) لاہور کے رنگ روڈ پر گاڑی کی چیکنگ کے دوران شہری سے رشوت لینے والے پولیس اہلکار کو ویڈیو وائرل ہونے پر گرفتار کر لیا گیا۔
رپورٹ کے مطابق تھانہ راوی روڈ میں تعینات پولیس اہلکار عبدالرحمان نے دورانِ چیکنگ شہری سے رشوت وصول کی، جس کی ویڈیو سوشل میڈیا پر تیزی سے وائرل ہوئی۔
وائرل ویڈیو میں دیکھا جا سکتا ہے کہ اہلکار شہری سے رشوت کی رقم بڑھانے کا مطالبہ کرتا ہے اور بسم اللہ پڑھ کر پیسے جیب میں ڈالتا ہے، جبکہ شہری کو گاڑی کے کاغذات ہمراہ رکھنے کی ہدایت بھی کرتا ہے۔
واقعے کا نوٹس لیتے ہوئے ڈی آئی جی آپریشنز فیصل کامران نے فوری کارروائی کا حکم دیا، جس پر متعلقہ اہلکار عبدالرحمان کو گرفتار کر لیا گیا۔
ڈی آئی جی آپریشنز فیصل کامران کا کہنا ہے کہ پولیس میں کرپشن، اختیارات کے ناجائز استعمال اور بدعنوانی کے خلاف زیرو ٹالرنس پالیسی پر عمل کیا جا رہا ہے، ایسے عناصر کے خلاف بلا امتیاز کارروائی کی جائے گی۔
پنجاب پولیس کا کانسٹیبل بسمہ الله پڑھ کر رشوت لے رہا ہے pic.twitter.com/0bQjMCCm2s
— Israr Ahmed Rajpoot (@ia_rajpoot) January 19, 2026
