احتساب عدالت نے پرویز الہٰی اور دیگر پر فرد جرم عائد کر دی

لاہور (جانوڈاٹ پی کے) احتساب عدالت نے کرپشن کیس کی سماعت کے دوران سابق وزیراعلیٰ پرویز الہٰی اور دیگر ملزمان پر فرد جرم عائد کر دی۔ لاہور کی احتساب عدالت کے جج رانا عارف نے نیب ریفرنس کی سماعت کی، جس میں پرویز الہٰی سمیت دیگر ملزمان اپنے وکیل عامر سعید راں کے ہمراہ پیش ہوئے۔

احتساب عدالت نے دوران سماعت پرویز الہٰی اور دیگر ملزمان پر فرد جرم عائد کی۔ ملزمان نے صحت جرم سے انکار کیا، جس کے بعد عدالت نے نیب کے گواہوں کو 29 جنوری کو پیش ہونے کا حکم دیا۔

نیب کی جانب سے پرویز الہٰی سمیت دیگر ملزمان کے خلاف گجرات میں ترقیاتی سکیموں میں کرپشن کا ریفرنس دائر کیا گیا تھا۔ نیب نے دو نئے ملزمان شامل کرنے کے بعد ضمنی ریفرنس بھی عدالت میں جمع کرایا تھا۔

احتساب عدالت نے کارروائی کو 29 جنوری تک ملتوی کرتے ہوئے گواہوں کی طلبی کر دی ہے۔