پاکستان اور یو اے ای کا پری امیگریشن کلیئرنس پر اتفاق، اب کلیئرنس پاکستان میں ہی ہوگی
اسلام آباد (جانوڈاٹ پی کے) وفاقی وزیر داخلہ محسن نقوی سے ڈائریکٹر جنرل کسٹمز و پورٹ سکیورٹی احمد بن لاحج الفلاسی کی سربراہی میں متحدہ عرب امارات کے اعلیٰ سطح وفد نے ملاقات کی، جس میں امیگریشن کے عمل کو مزید سہل بنانے کے طریقوں پر تفصیلی تبادلہ خیال کیا گیا۔
اس دوران دونوں ممالک کے درمیان پری امیگریشن کلیئرنس کے حوالے سے باضابطہ معاہدے پر اتفاق کیا گیا، جس کے تحت ابتدائی طور پر یہ نظام کراچی سے پائلٹ پروجیکٹ کے طور پر شروع کیا جائے گا۔
وفاقی وزیر داخلہ محسن نقوی نے بتایا کہ نئے نظام کے تحت مسافروں کی امیگریشن اور متعلقہ کلیئرنس پاکستان میں ہی مکمل ہو جائے گی، جس کے بعد یو اے ای پہنچنے پر انہیں طویل امیگریشن کارروائی سے نہیں گزرنا پڑے گا۔ اس نظام کے تحت مسافر ڈومیسٹک سفر کی طرح سیدھا ایئرپورٹ سے باہر نکل سکیں گے۔
محسن نقوی نے کہا کہ یہ اقدام سفر کو سہل بنانے، وقت کی بچت اور مسافروں کے مجموعی تجربے کو بہتر بنانے میں اہم کردار ادا کرے گا۔
یو اے ای کے وفد نے اس اقدام کو دونوں ممالک کے عوام کے لیے مفید قرار دیتے ہوئے ہر ممکن تعاون کی یقین دہانی کرائی۔ پائلٹ منصوبے کے انتظامی اور تکنیکی پہلوؤں کو حتمی شکل دینے کے لیے متعلقہ حکام کے درمیان رابطہ کاری جاری رہے گی، اور منصوبے کی کامیابی کے بعد اس نظام کو دوسرے شہروں میں بھی توسیع دی جائے گی۔
ملاقات میں ایگزیکٹو ڈائریکٹر ڈیجیٹل ٹرانسفارمیشن جما عبداللہ القابی، ایگزیکٹو ڈائریکٹر ایئرپورٹس حماد سیف المشغونی، وزیر مملکت برائے داخلہ طللال چوہدری اور وفاقی سیکرٹری داخلہ خرم آغا بھی موجود تھے۔
