صدر اور وزیراعظم کا شاہ سلمان کی علالت پر اظہار تشویش، جلد صحت یابی کی دعا

اسلام آباد (جانوڈاٹ پی کے) صدرِ مملکت آصف علی زرداری اور وزیراعظم شہباز شریف نے سعودی عرب کے فرمانروا شاہ سلمان بن عبدالعزیز کی علالت پر تشویش کا اظہار کرتے ہوئے ان کی جلد صحت یابی اور درازیٔ عمر کے لیے دعا کی ہے۔

صدرِ مملکت آصف علی زرداری نے شاہ سلمان بن عبدالعیز کے لیے نیک تمناؤں پر مشتمل پیغام بھجواتے ہوئے کہا کہ خادم الحرمین الشریفین کی صحت کے لیے پوری پاکستانی قوم دعاگو ہے۔ انہوں نے کہا کہ شاہ سلمان بن عبدالعزیز کو پاکستانی قوم کے دلوں میں بے حد احترام حاصل ہے، اللہ تعالیٰ انہیں مکمل صحت، عمرِ دراز اور قیادت کی مزید توفیق عطا فرمائے۔

وزیراعظم شہباز شریف نے بھی سعودی فرمانروا کی علالت پر اظہارِ افسوس کرتے ہوئے کہا کہ خادم الحرمین الشریفین کے اسپتال میں داخل ہونے کی خبر پر گہری تشویش ہے۔ وزیراعظم کا کہنا تھا کہ پاکستان کے عوام سعودی فرمانروا سے گہری عقیدت اور احترام رکھتے ہیں اور ان کی جلد و مکمل صحت یابی کے لیے دعاگو ہیں۔

خیال رہے کہ طبی معائنے کے بعد سعودی فرمانروا شاہ سلمان بن عبدالعزیز کو اسپتال سے گھر منتقل کر دیا گیا ہے، جبکہ ان کے میڈیکل ٹیسٹس تسلی بخش قرار دیے گئے ہیں۔