پاک بحریہ نے 1500 کلومیٹر دور کھلے سمندر میں سری لنکن عملے کے رکن کو کامیابی سے ریسکیو کرلیا

کراچی(جانوڈاٹ پی کے)افواجِ پاکستان نے گوادر سے تقریباً 1500 کلو میٹر دور کھلے سمندر میں ایک کامیاب ریسکیو آپریشن انجام دیا۔ یہ کارروائی سری لنکن میری ٹائم ریسکیو کوآرڈینیشن سینٹر کی درخواست پر کی گئی۔

اطلاع موصول ہوتے ہی پاک بحریہ نے فوری ردِعمل دیتے ہوئے اپنے بحری جہاز پی این ایس معاون اور پی این ایس تبوک کو امدادی مشن کے لیے روانہ کیا۔ پاک بحریہ کے جہازوں نے انڈونیشیا کے پرچم بردار تجارتی جہاز ایم وی گرے پام سے بیمار سری لنکن عملے کے ایک رکن کو بحفاظت ریسکیو کیا۔

بیمار اہلکار کو پی این ایس تبوک پر منتقل کر کے فوری طبی امداد فراہم کی گئی۔ پاک بحریہ نے مربوط میری ٹائم پروٹوکولز کو فوری طور پر متحرک کرتے ہوئے پیشہ ورانہ مہارت اور بروقت کارروائی کے ذریعے ریسکیو آپریشن کامیابی سے مکمل کیا۔

اس موقع پر سری لنکن حکام اور متاثرہ اہلکار کے اہلِ خانہ نے بروقت امداد اور تعاون پر پاکستان کا شکریہ ادا کیا۔ پاک بحریہ نے اس عزم کا اعادہ کیا کہ وہ سمندر میں انسانی جانوں کے تحفظ کے لیے قومیت سے بالاتر ہو کر اپنی بین الاقوامی ذمہ داریاں ادا کرتی رہے گی۔