ایران میں مظاہروں کے پیش نظر پاکستان نے شہریوں کو غیر ضروری سفر سے گریز کی ہدایت کر دی

اسلام آباد(جانوڈاٹ پی کے) ایران میں مہنگائی کے خلاف جاری مظاہروں اور ممکنہ پرتشدد واقعات کے پیش نظر پاکستان نے اپنے شہریوں کو غیر ضروری سفر سے گریز کرنے کی ہدایت کر دی ہے۔

دفتر خارجہ کی جانب سے جاری کردہ ایڈوائزری میں کہا گیا ہے کہ اپنی حفاظت اور سلامتی کے لیے پاکستانی شہریوں کو مشورہ دیا جاتا ہے کہ حالات بہتر ہونے تک اسلامی جمہوریہ ایران کا غیر ضروری سفر نہ کریں۔

ایڈوائزری میں مزید کہا گیا کہ ایران میں مقیم پاکستانی شہری بھی انتہائی احتیاط برتیں، چوکنا رہیں اور غیر ضروری نقل و حرکت کم سے کم رکھیں۔ اس کے علاوہ دفتر خارجہ نے شہریوں کی سہولت کے لیے ایرانی پاکستانی سفارتی دفاتر سے باقاعدہ رابطے میں رہنے کے نمبرز بھی جاری کیے ہیں۔

واضح رہے کہ ایران میں مہنگائی کے خلاف مظاہرے 13 روز سے جاری ہیں، جنہیں ایرانی سفیر کے مطابق غیر ملکی عناصر کی مداخلت نے پرتشدد بنا دیا ہے۔