وفاقی وزیررانا تنویر سے  برازیلی سفیر کی ملاقات، ڈیری اور لائیوسٹاک میں تعاون بڑھانے پراتفاق

اسلام آباد(جانوڈاٹ پی کے)وفاقی وزیرِ غذائی تحفظ رانا تنویر حسین اور برازیلی سفیر اولینتھو ویرا کے درمیان ملاقات ہوئی جس دوران ڈیری اور لائیو اسٹاک سیکٹر میں تعاون بڑھانے پر اتفاق کیا گیا جبکہ مشترکہ ورکنگ گروپ کے قیام کی تجویز بھی سامنے آئی۔

وفاقی وزیرِ غذائی تحفظ رانا تنویر حسین سے پاکستان میں تعینات برازیلی سفیر اولینتھو ویرا نے ملاقات کی۔ ملاقات میں پاکستان اور برازیل کے درمیان لائیو اسٹاک، ڈیری، گوشت اور زرعی خوراک کے شعبوں میں تعاون پر تفصیلی تبادلۂ خیال کیا گیا۔

رانا تنویر حسین نے کہا کہ پاکستان ڈیری سیکٹر میں برازیل کے استوائی ماڈل کو اپنانا چاہتا ہے، جبکہ لائیو اسٹاک اور گوشت کی برآمدات میں برازیل عالمی رہنما ہے۔ انہوں نے پاکستان برازیل مشترکہ ورکنگ گروپ کے قیام کی تجویز دیتے ہوئے کہا کہ تعاون سے پیداواری لاگت کم اور معیار بہتر ہوگا، جبکہ حلال گوشت کی عالمی منڈی میں پاکستان کا حصہ بڑھانا ترجیح ہے۔برازیلی سفیر نے کہا کہ برازیل نے تحقیق اور ادارہ جاتی اصلاحات سے زرعی انقلاب برپا کیا اور پاکستان کے ساتھ لائیو اسٹاک و ڈیری میں تعاون کا خواہاں ہے، تاہم برآمدات کے لیے بیماریوں پر قابو اور معیار کی بہتری بنیادی شرط ہے۔