فیلڈ مارشل عاصم منیر سے اردن کے چیئرمین جوائنٹ چیفس آف اسٹاف میجر جنرل یوسف کی ملاقات
اسلام آباد(جانوڈاٹ پی کے)اردن کی مسلح افواج کے چیئرمین جوائنٹ چیفس آف اسٹاف میجر جنرل یوسف احمد نے جی ایچ کیو کا دورہ کیا، جہاں چیف آف ڈیفنس فورسز، آرمی چیف فیلڈ مارشل عاصم منیر سے ان کی ملاقات ہوئی۔
آئی ایس پی آر کے مطابق ملاقات کے دوران باہمی دلچسپی کے امور،خطےکی سیکیورٹی صورتحال پر تبادلہ خیال کیا گیا، دفاعی و عسکری تعاون کو مزید فروغ دینے کے امکانات پر بات چیت کی گئی، معزز مہمان نے پاکستان کی مسلح افواج کی پیشہ وارانہ صلاحیتوں کو سراہا۔ معزز مہمان نے خطے میں امن واستحکام کیلئے ان کی خدمات کو خراجِ تحسین پیش کیا۔
فیلڈ مارشل عاصم منیرنے اردن کے ساتھ دفاعی تعلقات کو مزید مضبوط بنانے کے عزم کا اعادہ کیا اور بدلتے ہوئے سیکیورٹی چیلنجز سے نمٹنے کیلئے باہمی تعاون کی اہمیت پر زور دیا۔ دونوں برادر ممالک کے درمیان عسکری سطح پر تعاون کو مزید وسعت دینے کے مشترکہ عزم کا اعادہ بھی کیا گیا ۔
