اوورسیز پاکستانیوں کے لیے موبائل فون ٹیکس میں کمی کا امکان

  اسلام آباد(جانوڈاٹ پی کے) بیرون ملک سے موبائل فون ساتھ لانے والے اوورسیز پاکستانیوں کو ایف بی آر حکام نے خوشخبری سنائی ہے کہ ان پر ٹیکس میں کمی زیرغور ہے۔

تفصیلات کے مطابق قومی اسمبلی کی خزانہ کمیٹی کا اجلاس ہوا، جس میں چیئرمین ایف بی آر راشد لنگڑیال نے کہا کہ اوورسیز پاکستانیوں کیلئے پرانے فون لانے پر ٹیکس میں کمی زیرغور ہے۔

چیئرمین ایف بی آر نے مزید کہا کہ استعمال شدہ کم ویلیو موبائل فون پر ڈیوٹی میں کمی پر بھی غور کیا جارہا ہے، مارچ تک موبائل فون ٹیکس میں کمی کی رپورٹ تیار ہوجائے گی۔

اس موقع پر چیئرمین پی ٹی اے نے کہا کہ پاکستان میں صرف 6 فیصد موبائل فون امپورٹ ہوتے ہیں، ملک میں 94 فیصد موبائل فون مقامی طور پر تیار ہورہے ہیں۔

پاکستان ٹیلی کمیونیکیشن اتھارٹی کے چیئرمین کا مزید کہنا تھا کہ مقامی طور پر تیارکردہ فونز پر ٹیکس صرف 5 سے 6 فیصد ہے۔

ممبر کسٹمز شکیل شاہ کا کہنا تھا کہ موبائل کی خریداری سے 82 ارب روپے ٹیکس حاصل ہوا جبکہ درآمدی موبائل فونز سے 18 ارب روپے ریونیو ملا۔