اپوزیشن لیڈر کے تقرر پر بڑی پیش رفت
اسلام آباد(جانوڈاٹ پی کے) قومی اسمبلی میں اپوزیشن لیڈر کے تقرر کے معاملے پر پاکستان تحریک انصاف کے چیف وہپ عامر ڈوگر اور اسپیکر قومی اسمبلی سردار ایاز صادق کے درمیان اہم ملاقات ہوئی ہے، جس میں تقرری کے عمل پر تفصیلی تبادلہ خیال کیا گیا۔
ذرائع کے مطابق ملاقات کے دوران عامر ڈوگر نے عمر ایوب کی جانب سے پشاور ہائی کورٹ میں دائر درخواست کے خارج ہونے کی کاپی اسپیکر قومی اسمبلی کو فراہم کی۔ پی ٹی آئی چیف وہپ نے اسپیکر سے اپوزیشن لیڈر کی جلد تقرری کی درخواست بھی کی۔
عامر ڈوگر نے مؤقف اختیار کیا کہ پاکستان تحریک انصاف کی جانب سے اپوزیشن لیڈر کی نشست سے متعلق دائر تمام قانونی مقدمات واپس لے لیے گئے ہیں۔ ان کا کہنا تھا کہ قانونی معاملات کے حل کے بعد اب اپوزیشن لیڈر کی تقرری میں کوئی رکاوٹ باقی نہیں رہی۔
واضح رہے کہ اس سے قبل اسپیکر قومی اسمبلی سردار ایاز صادق اپوزیشن لیڈر کی تقرری کے معاملے پر پاکستان تحریک انصاف کو چار خطوط ارسال کر چکے ہیں، جن میں اس حوالے سے وضاحت طلب کی گئی تھی۔
