او آئی سی کا صومالی لینڈ سے متعلق اسرائیلی اقدام مسترد، صومالیہ کی خودمختاری کی بھرپور حمایت کا اعادہ
جدہ (مانیٹرنگ ڈیسک) اسلامی تعاون تنظیم (او آئی سی) نے صومالی لینڈ کو تسلیم کرنے کے نام نہاد اسرائیلی اقدام کو سختی سے مسترد کرتے ہوئے اسے بین الاقوامی قوانین کی صریح خلاف ورزی قرار دے دیا ہے۔
سعودی عرب میں صومالی لینڈ تنازع پر او آئی سی کے وزرائے خارجہ کا ہنگامی اجلاس جاری ہے۔ اجلاس سے خطاب کرتے ہوئے سیکرٹری جنرل او آئی سی نے واضح کیا کہ تنظیم صومالیہ کی خودمختاری اور علاقائی سالمیت کی مکمل حمایت کرتی ہے اور صومالی لینڈ سے متعلق کسی بھی یکطرفہ اقدام کو قبول نہیں کیا جا سکتا۔
سعودی عرب کے نائب وزیر خارجہ ولید بن عبدالکریم نے کہا کہ صومالیہ کی خودمختاری کو نقصان پہنچانے کی ہر کوشش کو مسترد کرتے ہیں۔ ان کا کہنا تھا کہ صومالی حکومت مذاکرات کے ذریعے خطے کے ممالک کو متحد کر سکتی ہے، جبکہ غزہ میں جنگ بندی کے دوسرے مرحلے پر بھی زور دیا گیا۔
فلسطینی وزیر خارجہ نے بھی صومالیہ کی اقوام متحدہ سے تسلیم شدہ سرحدوں کی حمایت کا اعلان کرتے ہوئے کہا کہ صومالی لینڈ کو تسلیم کرنے کا اسرائیلی اقدام عالمی قوانین کی کھلی خلاف ورزی ہے۔
صومالی وزیر خارجہ نے دوٹوک موقف اختیار کرتے ہوئے کہا کہ صومالیہ کی سرزمین کسی ملک کو استعمال کرنے کی اجازت نہیں دی جائے گی۔ ان کے مطابق صومالیہ کی سرحدوں کی خلاف ورزی دراصل اس کی خودمختاری پر حملہ ہے، جبکہ نام نہاد صومالی لینڈ وفاقی صومالیہ کا اٹوٹ حصہ ہے۔
ترکیہ کے نمائندے نے اپنے خطاب میں کہا کہ اسرائیل کا صومالی لینڈ کو تسلیم کرنے کا اقدام ناقابل قبول ہے اور ترکیہ صومالیہ کے اتحاد، خودمختاری اور علاقائی سالمیت کی بھرپور حمایت جاری رکھے گا۔
