این اے129لاہور ضمنی انتخاب، ن لیگ کے حافظ میاں نعمان کامیاب ہوگئے، غیر حتمی غیر سرکاری نتیجہ

لاہور(جانوڈاٹ پی کے)قومی اسمبلی کے حلقہ این اے 129 لاہور میں ہونے والے ضمنی انتخاب کے غیرحتمی غیر سرکاری نتیجے کے مطابق مسلم ليگ ن کے حافظ میاں محمد نعمان 63441 ووٹ لے کر کامیاب  ہوگئے۔

این اے129 لاہور کے تمام 334 پولنگ اسٹیشنز کے غیرحتمی غیر سرکاری نتیجے کے مطابق مسلم ليگ ن کے حافظ میاں محمد نعمان نے میدان مار لیا ہے۔

غیرحتمی غیر سرکاری نتیجے کے مطابق  حافظ میاں محمد نعمان  63441 ووٹ لے کر کامیاب ہوئے۔

پی ٹی آئی کے حمایت یافتہ آزاد امیدوار  ارسلان احمد 29099 ووٹ لےکر دوسرے نمبر پر رہے۔

خیال رہےکہ حلقہ این اے129 لاہورمیں مسلم لیگ ن کی جانب سےمیاں محمد نعمان، پی ٹی آئی کے  سابق وفاقی وزیر حماد اظہر کے بھانجے  ارسلان احمد  اور  آزاد امیدوار  بجاش خان نیازی سمیت 17 امیدوار  میدان میں تھے۔

این اے 129 لاہور میں ووٹرز کی کل تعداد 5 لاکھ58 ہزار 364 ہے۔ مرد ووٹرز  2 لاکھ 89 ہزار 339 اور خواتین ووٹرز  2 لاکھ69 ہزار25 ہیں۔

یہ حلقہ سمن آباد، گلشن راوی، بابو صابو، بکر منڈی، چوبرجی، پونچھ روڈ،کچا فیروز پور روڈ، سبزہ زار ،  اقبال ٹاؤن اور  جی آر او ٹو سمیت دیگر علاقوں پر مشتمل ہے۔

حلقے میں کل 334پولنگ اسٹیشن اور  ایک ہزار 45 پولنگ بوتھ بنائے گئے تھے، مردوں کے 133، خواتین کے 131 اور 70 مشترکہ پولنگ اسٹیشنز تھے۔

این اے 129 لاہور کی نشست پی ٹی آئی کے میاں محمد اظہر کی وفات کے باعث خالی ہوئی تھی۔

عام انتخابات میں میاں محمد اظہر نے یہاں سےایک لاکھ 3 ہزار 718 اور مسلم لیگ ن کے امیدوار میاں محمد نعمان نے 71 ہزار 540ووٹ حاصل کیے تھے۔