اکشے کمار اور ٹوئنکل کھنہ کی گاڑی ممبئی میں خوفناک حادثے کا شکار
ممبئی (مانیٹرنگ ڈیسک)بالی ووڈ کی معروف اداکار جوڑی اکشے کمار اور ٹوئنکل کھنہ گزشتہ شب ممبئی میں پیش آنے والے ایک خوفناک ٹریفک حادثے سے معجزانہ طور پر محفوظ رہی۔
واقعہ اس وقت پیش آیا جب یہ جوڑا بیرونِ ملک سفر سے واپسی کے بعد ایئرپورٹ سے جوہو میں واقع اپنی رہائش گاہ کی جانب جا رہا تھا۔ ذرائع کے مطابق رات تقریباً 9 بجے سلور بیچ کیفے کے قریب ایک تیز رفتار مرسڈیز گاڑی نے ایک آٹو رکشہ کو ٹکر ماری، جس کے نتیجے میں رکشہ اکشے کمار کے سیکیورٹی قافلے میں شامل ایک گاڑی سے جا ٹکرایا۔
ٹکر کے باعث قافلے میں شامل آگے چلنے والی اداکار کی ایس یو وی کو بھی معمولی نقصان پہنچا، جس سے اکشے کمار اور ٹوئنکل کھنہ کو ہلکا سا جھٹکا لگا، تاہم دونوں مکمل طور پر محفوظ رہے۔
عینی شاہدین کے مطابق آٹو رکشہ بری طرح دب گیا تھا، تاہم اس میں سوار ڈرائیور اور ایک مسافر کو کافی جدوجہد کے بعد زندہ باہر نکال لیا گیا۔
ذرائع کا کہنا ہے کہ اکشے کمار خود گاڑی سے باہر نکلے اور اپنی سیکیورٹی ٹیم کے ہمراہ رکشہ کو اٹھا کر زخمی افراد کو نکالنے میں عملی مدد کی۔
پولیس حکام نے تصدیق کی ہے کہ حادثے میں کوئی بھی شخص شدید زخمی نہیں ہوا۔ واضح رہے کہ اکشے کمار اور ٹوئنکل کھنہ اپنی شادی کی پچیسویں سالگرہ منانے کے بعد وطن واپس پہنچے تھے۔
