بیرونی سرمایہ کاری میں43.3فیصد کمی،برآمدات بھی5فیصد کم ہوگئی

اسلام آباد(جانو ڈاٹ پی کے)رواں مالی سال جولائی تا دسمبر2025ء ملک میں براہ راست بیرونی سرمایہ کاری میں43.3فیصد کمی کا انکشاف ہوا ہے,ملکی برآمدات بھی5فیصد کمی سے15.5ارب ڈالر تک محدود ہوگئیں۔وزارت خزانہ کی اقتصادی آؤٹ لک رپورٹ کے مطابق جولائی تا دسمبر براہ راست بیرونی سرمایہ کاری کا حجم 81 کروڑ ڈالر ریکارڈ کیا گیا اور ملکی درآمدات 12.3 فیصد اضافے سے 31 ارب ڈالر سے تجاوز کر گئیں، چھ ماہ میں ترسیلات زر10فیصد اضافے سے19.73ارب ڈالر رہیں، کرنٹ اکاؤنٹ خسارہ 1.17ارب ڈالر رہا۔ڈالر ریٹ278.7سے بڑھ کر 279.9روپے تک پہنچ گیا جبکہ پہلے پانچ ماہ میں بڑی صنعتوں کی پیداوار میں 6 فیصد اضافہ ریکارڈ کیا گیا جب کہ پرائمری سرپلس 3651 ارب روپے ریکارڈ کیا گیا۔وزارت خزانہ کی آؤٹ لُک رپورٹ کے مطابق ایف بی آر ریونیو 9.5 فیصد اضافے سے 6 ہزار 160ارب روپے رہا، نان ٹیکس ریونیو 4.8فیصد اضافے سے3581 ارب روپے ریکارڈ کیا گیا۔رپورٹ کے مطابق اسٹیٹ بینک کے زرمبادلہ کے ذخائر بڑھ کر 16.1 ارب ڈالر ہوگئے، مالی سال 2026ء کی پہلی ششماہی میں معاشی استحکام برقرار رہا، مالی سال 26-2025 میں ملکی معیشت کی رفتار برقرار رہنے کی توقع ظاہر کی گئی۔وزارت خزانہ کی آؤٹ لُک رپورٹ کے مطابق بہتر مالی نظم و ضبط سے معاشی استحکام کو سہارا ملا، رواں ماہ مہنگائی 5 سے 6 فیصد کے درمیان رہنے کا امکان ہے، مہنگائی قابو میں، ایل ایس ایم کی نمو میں واضح بہتری آئی۔