ذہنی دباؤ یا ناامیدی کی صورت میں فوراً 15 پر کال کریں، بروقت مدد دستیاب

لاہور(جانوڈاٹ پی کے)سیف سٹی اتھارٹی نےپنجاب میں ذہنی دباؤکا شکار افراد کیلئے مخصوص سہولت کا آغاز کردیا ، ناامیدی یا خودکشی کے خیالات کی صورت میں ون فائیو پر کال کرکے ماہر نفسیات سے رابطہ ہو گا ۔

ترجمان سیف سٹی اتھارٹی کے مطابق شدید ذہنی دباؤ کی صورت میں پولیس ہیلپ لائن ون فائیو پرکال کرکے سات ملانے پر شہری کا رابطہ ماہر نفسیات سے کروائے گا ۔ ماہر نفسیات بروقت کونسلنگ سے متاثرہ شہری کو کسی بھی طرح کے انتہائی اقدام سے بچنے کیلئے قائل کریگا ۔

 حکام کے مطابق گذشتہ سال کےدوران 2269 افراد کو ون فائیو پر کال کرنے پرخودکشی یا نقصان دہ اقدام سے بچایا گیا ہے ۔ موصول ہونیوالی کالز میں سے 56 فیصد مرد جبکہ 44 فیصد خواتین کی تھیں ۔ شہری ذہنی دباو کی صورت میں ون فائیو پر کال کرکے مدد لے سکتے ہیں ۔