وزیراعلیٰ پنجاب کی ہر ضلع میں سٹروک مینجمنٹ سنٹر بنانے کی منظوری

لاہور (جانوڈاٹ پی کے)وزیراعلیٰ پنجاب مریم نواز شریف نے صوبے بھر میں فالج کے مریضوں کو بروقت اور معیاری علاج کی فراہمی کے لیے ہر ضلع میں اسٹروک مینجمنٹ سینٹر قائم کرنے کی منظوری دے دی ہے۔ اس ضمن میں ہر ڈسٹرکٹ ہیڈکوارٹر (ڈی ایچ کیو) اسپتال میں نیورالوجسٹ اور پیڈیاٹرک نیورالوجسٹ کی تعیناتی کا اصولی فیصلہ بھی کر لیا گیا ہے۔

وزیراعلیٰ کی ہدایت پر ہر ضلع میں ایک ڈاکٹر اور ایک نرس کو فوری طور پر تین ماہ کی اسٹرروک مینجمنٹ کی خصوصی تربیت دی جائے گی تاکہ فالج کے مریضوں کو ابتدائی مرحلے میں مؤثر علاج فراہم کیا جا سکے۔

مریم نواز شریف نے فالج کے مریضوں کے لیے فوری ٹیلی میڈیسن پراجیکٹ شروع کرنے کا بھی حکم دیا، جس کے تحت ضلعی اسپتالوں کے ڈاکٹر فالج کے مریض کے فوری علاج کے لیے سپیشلسٹ اور کنسلٹنٹس سے براہِ راست ٹیلی فونک رابطہ کر سکیں گے۔

وزیراعلیٰ نے اسٹرروک مینجمنٹ سینٹرز کے لیے نرسز ٹریننگ پروگرام شروع کرنے اور فالج کے علاج سے متعلق عوامی آگاہی مہم لانچ کرنے کی ہدایت دیتے ہوئے کہا کہ فالج کے علاج میں “گولڈن آورز” کی اہمیت مسلمہ ہے اور اس آگاہی مہم کی قیادت وہ خود کریں گی۔

انہوں نے کہا کہ پنجاب کے ہر چلڈرن اسپتال میں بھی اسٹرروک مینجمنٹ سینٹر قائم کیے جائیں گے تاکہ کسی مریض کو علاج کے لیے بڑے شہروں کا رخ نہ کرنا پڑے۔

خصوصی اجلاس کے دوران پمز کے نیورالوجسٹ ڈاکٹر قاسم بشیر نے وزیراعلیٰ کو اسٹرروک مینجمنٹ پروگرام پر بریفنگ دیتے ہوئے بتایا کہ 25 سال سے زائد عمر کے ہر چار میں سے ایک فرد کو فالج کا خطرہ لاحق ہو سکتا ہے، جبکہ فالج کے مؤثر علاج کے لیے پری ہاسپٹل، ہاسپٹل اور پوسٹ ہاسپٹل کیئر سے متعلق آگاہی اور تربیت ناگزیر ہے۔